Aql-aɣ deg tsemhuyt n lexrif, d lawan n ujmaε n lɣella n uzemmur, llan yimezdaɣ deg tama-agi n Ouaguenoun i yebdan yakan lqeḍ n uzemmur, llan wid mazal urεad bdin. Ulamma tamnaḍt-agi tettwassen s lɣella n zzit n uzemmur, maca deg yiseggasen-agi iεeddan ur tessefraḥ ara tarewt n uzemmur imezdaɣ n tama-a. Dɣa deg useggas-agi, la nettwali lɣella n uzemmur txusen s waṭas, d ayen iɣef ssḥasfen i fellaḥen n temnaḍt-a n Ouaguenoun. D ayen ara yeğğen tuget deg-sen ad d-ağğwen zzit n uzemmur s tmara. Yerna aṭas n lğihat ideg i d-iban lexsas n lɣella-a, llant tzemmrin ur d-ngir ara ula d aεeqqa, anagar tid-nni yellan rrif rrif n yiberdan. Imi εlaḥsab n yimussnawen deg taɣult-agi, qqaren-d d akken tizemmrin yella tama n ubrid, ttarwent s waṭas, imi aɣebbar-nni yettilin fell-asent yettqeriε aṭas n lehlakat. Ulama deg useggas yezrin ixus uzemmur, maca mačči am useggas-agi. D amedya : ilindi tenza zzit n uzemmur dagi deg Ouaguenoun s 800 DA i litra, yezmer lḥal aseggas-agi, ad tenz s 850 DA neɣ ahat s 900 DA. Aṭas n ssebbat i d-yeglan s lexsas n uzemmur, gar-asent: aṭas n yimezdaɣ ur nxeddem ara azemmur-nsen (ur neqcen, ur fersen ama deg lqaεa ama di cciṭa), ssebba-nniḍen, daɣen, d ideflawen i d-yewten deg yiseggasen iεeddan…atg.
Adaoun Abdel Ghani