Anegzum n wassaɣ gar yimqimen iwsilen d tgejda uɣur qqnen :
• Sb. 15. “ Fafuc akked setti-s Takarut qqiment-d ɣer tmeṭṭut n εemmi-s Tamensurt, d taǧǧalt tamecṭuḥt , Argaz-is imut d ameẓẓyan am baba-s Ameur akked gma-s, baba-s n Fafuc.“ Muqel « s“ deg « baba-s“ : yettuɣal ɣer urgaz n taǧǧalt , neɣ ɣer Fafuc neɣ εad ɣer Tmensurt ? Fiḥel ad yemmeslay yiwen ɣef usigez d tira n yismawen (Ameur).
• Sb. „ Aserdun ibedd, sin ifassen kkan-d nnig tɣerdin-is“ Amqim « is“ ur yeqqin ara ɣer userdun, yesmektay-d Fafuc. D acu kan ulac allal i yezdin gar tefyar akken yal awal ad iban yixf-is, ad tban tagust uɣur icudd.
Iɣimi ɣef yiwen n usentel
Iban-d lexsas n usemres n ulugen n usmekti deg wungal “Tislit n uɣanim”. Amedya, deg usebter 22: yuɣal-d yisem n Dehbiya 3 iberdan deg snat n tefyar ideg ulac maḍi urar ɣef uɣanib. D awal imserreḥ, yejla fell-as uɣilif n tsekla.
Lmizan gar yimuren n tefyirt
Dagi diɣen, yessefk ad yefres umaru aḍris ines. Deg tefyirt « Yiwen yerfed-d ayemmus, wayeḍ yessawel-as i Fafuc.“ Sb.24. ur mgadan ara yiḥricen; amyag amezwaru n tigawt akked wis-sin mgarraden taɣulin.
Tanmegla : Seg tseddart ɣer tayeḍ neɣ seg usebter ɣer wayeḍ, itettu umaru ayen iɣef d-ikka, ikeččem deg tenmegla.
Md: sb. 16: Tazwara, ad naf Fafuc terkeb ɣef userdun, teḥjeb s ubernus d uḥayek d umeclux. Yerna tettru. Γas deg tegnit-a, “ iles-is iḥreqsen s ugusim irna cbaḥa i wudem-is “
Md: sb. 16-17: Fafuc, sufella n userdun, iqeffafen ddan akken yid-s, maca “ Kra din ur tefhim”, meḥsub ur teẓri ara d acu-t akk wayenni. Armi qrib ad taweḍ s axxam n urgaz-is i tefhem iman-is d tikli i tedda d tislit !
Γer waya, yerna-d umyeεreq gar wawalen
( Md: sb.23 : lmeεna / lemεana) akked usnulfu n yinumak (md: sb.25: “ lbaṭel yerfed tadist” / mačči kan “ s tadist”) .
Ungal n R.B. yunef i yilugan n tira; yunef i wid n usenfali. Lemǧaz-is yeṭṭef kan deg tinna akken “imi d tamaziɣt wicqa !” D tidet, ayen akka i tettidir tsekla tamaziɣt d lemri; azekka, ad walin medden deg-s amezruy n luεer n tnekra d unerni i tmugger tsekla-a, maca ur ilaq ara ad d-yarew waya tawaɣit ara tt-ikerfen.
Yeqqim-d deg warrazen, mačči d tawafit n menwala. Llan wansayen ibedden ɣef tsulal iǧehden, ad ten-yeḍfer bab n cci; win ur nessin ad ixiḍ ad yeḍfer nnfadi. Tamaziɣt ur teḥwaǧ ara aseḥnunef ! Γas s yisem n Assia Djebbar.
Racid Buxerrub, Tislit n uɣanim, El Amel, 2015, 157 sb. 250 DA.
Yahia Bellil, d aselmad n tmaziɣt (PEM)