Gar-aneɣ d kra n leḍwar kan, ad as-yekker unaẓur ageɛmir Zedek Moulud i yiwet n tuzzya tamaḍlant n tẓuri ɣer waṭas n tmura. D tagnit i iḍulen ayendin i temlilit akked uzayez-ines i inuḥen deg rebɛa n tɣemmar n ddunit, d usbeɛzeq n tutlayt tazwawt akkin i yilel. Bab n « tidderwect-iw » ur iḥebbes ihi asikel seg furar n useggas-a i d-iteddun 2017, almi d yennayer n 2018. Ad as-yebdu seg tmurt n Fransa deg furar d meɣres n qabel, ladɣa tamaneɣt Paris, Lyon, d Marseille. Uqbel ad yeṭṭef abrid n Canada d Marikan anda i t-ttraǧun ttiɛadat imeqqranen n ccna, abeɛda deg Montréal ideg neẓra llan waṭas n yizwawen d yimaziɣen. Deffir tmura-a n umalu, ad d-yuɣal mmi-s n At Xelfun ɣer yidurar i t-id-irebban, anda yetturaǧu ad yeg igalaten s wazal-nsen deg Tizi, Bgayet d Tubiret, gar mayyu d yulyu n useggas 2017. Seg ubeḥri n Ǧerǧer, ad yunag Zedek Moulud ɣer watmaten Imaziɣen n Merruk anda ara yemlil imḥemmalen-is deg Agadir deg wayyur n ctember. Syin, ad d-yezzi ɣer Lezzayer tamaneɣt i tegnit n ccna d unnecraḥ akked waṭas daɣen n wid i t-yeṭṭafaren. Ad tili tmeɣra tameqqrant Zenith n Paris i lmend n yennayer 2018. Tuzzya-a n tẓuri, ara d-yettwaheggin s tallelt n yimeddukkal n Zedek Moulud, tusa-d deg lawan-is d tidet, imi taggara-a, ur d-yeffiɣ unaẓur-a ɣer uzayez-ines, ama deg tmurt n Yizwawen, anda ur as-d-ssawalen yimḍebbren, neɣ deg tmura n berra. D tignatin yeggten ihi, i ur zmiren ad sruḥen wid yettakken azal i wawal, d wid yeẓran acu d-yewwi bab n « Taqbaylit-nni » i yidles-nneɣ, skud neḥsa yenna-t-id yakan: “ur zmireɣ ara ad bedleɣ ɣef teqbaylit!”.
Mhenni Khalifi