Tiwizi n uzemmur n Sidi Sliman d yiwen n wansay aqdim i ulac win i as-yecfan seg melmi i tebda, ar ass-a mazal ṭṭfent deg-s snat n tudrin “Lmecta d At sellam” deg yilulen n usamar tama n Uqbu . amek i d-yettili ? .
“Si zik yal mi ara ad d-yawweḍ yennayer, yettili-d ubaraḥ ttemlilin-d medden ɣer tejmaɛt n taddart ,nettheggi iman-nneɣ i wakken ad tebdu twizi, win yesɛan acaraɛ ad t-id-yawwi , bu zayla ad d-yessiweḍ, ula d tilawin ttilint tmenharin , d nutenti i zeggiren sdat-tsen, sendahent ɣer leqdic. Mi ɛeddant si tzemmurt ɣer tayeḍ, yettili-d usgunfu s ubendayar d cnawi ,…” i d-yenna Ɛemmi salaḥ, d amɣar ameqqran n taddart n Lmecta, 90 n yiseggasen di leɛmer-is. Ass-nni n leǧmɛa yezrin, arrac, irgazen , tilawin , imɣaren, fɣen zik, deg yifasen-nsen tigelzyam, imurar n warruz, icellafen, imextafen, uɣen abrid ɣer lemluk i wakken ad d-leqḍen azemmur n Sidi Sliman. Ayen i d-irennun cbaḥa n twizi-agi, d laɛyaḍ n yigurden, lɣaṭi d cnawi n tulawin akked d yicewiqen n temɣarin iwumi ara tselleḍ di yal tama. Si lebɛid i d-ttbanent tzemrin. Irgazen am yifrax s ufella-nsent, di leqwaɛi tilawin am tferṭṭeta, yal yiwet s nnul-is. ‘’D ussan n lferḥ, d yiwet n twizi i izeṭṭen assaɣen n tegmat gar yimezdaɣ, tettara-ten ttḥulfun i yiman-nsen amzun d yiwet n twacult’’. i aɣ-d- yenna zidane Benamara d imdebber n taddart n At Sellam. Azemmur n Sidi Slimane, deg wazal n 600 n tzemrin, yettara-d alamma d 10 n yiqenṭaren n zzit macki yerbaḥ useggas. Aḥric deg-s, siǧǧiwent i yimezḍaɣ s ssuma maɛqulen, aḥric ɣer berra. Idrimen i d-ttawin deg-s, ttqabalen yis-sen lecɣalat n taddart am tliwa, ttaɣen akal i taddart … atg. Aḥric-nniḍen, ttaǧǧan-t i ttbiyita i d-yettilin snat n tikwal deg useggas. Tacemlit n useggas-a, tekfa s yimensi, send imi d-subben yifellaḥen ɣef tzemmrin, tulawin kfan-d alqad di leqwaɛi. Mlalen-d yimezdaɣ ɣer yiwen n umraḥ iwumi qqaren Alemsu Tqarrabet, zzin i tarbuyin n seksu. tekfa twizi s cnawi d usbuɣar. ‘’Lfarḥ n wass-a, ncalleh d win ara idumen, imi tekfa twizi n uzemmur di talwit ulac afellah i d-yeɣlin ɣef tzemmurt, neɣ tameṭṭut yegrarben. Nessaram tisutiwin i d-yettenkaren, ad ṭṭfent di twizi-agi’’, i d-tenna Nna Wardiya, yiwet n temɣart n lbaraka
Brahim Benhamouche