Am wakken i t-id-nɛeyyen deg yisebtar-a n Uɣmis n Yimaɣen, yeḍra-d ddurt-a iɛeddan uneḍruy ameqqran n useḥbubbec d usegzurrez n wawal deg Udrar n Fad, taɣiwant n Ayt Smaɛel: ta d taẓrigt tis 15 n tfaska taɣelnawt n tmedyezt tamaziɣt, d tajmilt, am dima, i umussnaw Dda Lmulud At Mɛemmer. Tuɣ diɣ tejmilt i umasdawan Kamal Buɛmara i yettwafernen i usmended n tedwilt n useggas-a. Ugar n yinebgawen i yennumen yakan tirza d tikkin, llan-d wiyaḍ d imaynuten tikkelt-a imi d-rzan yiɛeggalen n Useqqamu Unnig n Timmuzɣa i lmend n wahil i d-yettwaheggan ɣef tizri n twinest segmi d-ilul Dda Lmulud. S umata, yella-d, deg wass amenzu, awal n teldayt sɣur uselway n Tdukkla n Udrar n Fad Mass Qerrac Hakim, Sadeq Rebbaɛi, Kamal Buɛmara d Si Lhacmi Ɛessad, d uselway n tɣiwant n Ayt Smaɛel Ɛebdun Nasir. Yal yiwen yewwi-d awal ɣef wayen akka txeddem tdukkla, ideg yettwabder-d s waṭas Dda Lmulud. Syin, yemmug-d usarag-askasi ɣef uqeddic n Kamal Buɛmara sɣur yiselmaden n tesdawit n Bgayet, akken armi d tameddit, d tignatin n tmenna i d-yettuɣalen. Deg wass wis sin, ddeqs n tegnatin n tmenna n yisefra i d-yellan, ɣas ma iban-d ladɣa usarag n Massa Buxellu ɣef udlis “ La traversée” n Dda Lmulud. Ma d ass n taggara, ḍefren yimeḥḍar mettwal 09:00 i usenzer n usaru n yimifriren n yilindi, d usarag sɣur Mass Bellac Takfarinas ɣef udlis “Si Lbacir Amellaḥ” n Kamal Buɛmara. Akken i d-tella tikci n warraẓen i wid d-yufraren. Ttunefken s ttbut warrazen amenzu, wis sin d wis kraḍ i yimedyazen Belɛid Tamsawt, Nawal Maɛuci d Seddiri Fahima akked kra n warrazen n usebɣes, am win n tmeṭṭut, win yimezgi, n umɣar d yilemẓi.
Ayen i d-nnan
Belɛid Tamsawt (arraz amezwaru): «Bɣiɣ tazwara, ad snemreɣ Tiddukkla Tadelsant Adrar n Fad ɣef leqdic i d-tettheggi yal aseggas. Ferḥeɣ imi tajmilt aseggas-a, tuɣal i sin n yirgazen s wazal-nsen : Mass Kamal Buɛmara i iqeddcen ɣef tsekla d yidles aqbayli, akked Dda Lmulud At Mɛemmer i yefkan tudert-is ɣef teqbaylit. Tanemmirt i yimedyazen i yettilin ɣer tama-w yal tikkelt. Ssarameɣ ad kkiɣ ɣas ulamma s wayen fessusen deg usegmu n tmedyazt taqbaylit».
Nawal Maɛuci (arraz wis sin): «S lferḥ meqqren i rziɣ ɣer Udrar n Fad imi tafaska-a d aɣerbaz n tmedyazt. Tumert-iw tzad imi tamedyazt-iw teεjeb i tesqamut, i wid i as-yeslan, i yiselmaden-iw. Imi ɣur-i d wa i d arraz i yifen arrazen».
Seddiri Fahima (arraz wis kraḍ): «Ssarameɣ ad yili warraz d afud ur d uruz. Yella deg tfaska wayen yelhan d wayen ixussen, ma d tidukkla d wat-is ttqadareɣ leqdic-nsen aṭas».
M. K.