Mbeɛd ayendin d ameslay yeḥman ɣef yir ssifa i d-yefka usebdad n Lwennas Meɛtub deg tɣiwant Ssuq Letnin, ama deg tɣamsa neɣ deg yiẓeḍwan inmettiyen, kkren yimḍebbren n tɣiwant-a, qelɛen-t akken ad as-yettwaɛiwed ureqqeɛ. Ad d-nesmekti dakken llan cetkayen wid iḥemmlen Lwennas Meɛtub seg usebdad-a, i yettwasbedden I lmend n umulli n Tefsut n Yimaziɣen, acku walan-t yessexser ama d udem n unaẓur i yettzemmil, ama d tiddi-s. Dɣa imi teṣfa nniya n tɣiwant n Ssuq Letnin, tessufeɣ-d ulɣu ass n 23 yebrir, ideg i d-nnan, kksen-t akken ad as-iɛiweḍ amsal unaẓur i t-ixedmen. Ad t-id-yerr yettcabi ugar ɣer win yefkan tudert-is ɣef yidles-is. Ulamma sḥassfen ɣef kra n tmuɣliwin n diri, ur nelli d tibennayin, sɣur kra. Ma yella d asbedd-ines tikkelt-nniḍen, ad yili ass n 25 deg yunyu, ɣef leḥsab n yisallen i aɣ-d-yewwḍen.
M. K.