Ass n lğemɛa yezrin, tazeqqa n waddalen yemxallafen Rabah Bitat n Tubiret telli tiwwura-s i yiwet n temlilit n ddabex n udar daxel n tzeqqa yesdukklen MCBgayet akked ASGuelma.
D tikkelt tamenzut ara d-tili s wudem unsib teqbuct n Lezzayer deg ssenf-a n wurar. Uqbel beddu n temlilit, atas n yimdebbren i ihedren i usihar-a anaddal amenzu deg-sen anemhal n waddal d yilmezyen n Tubiret, rnan-d γur-s iɛeggalen n tfidiralit n ddabex n udar, imi d nutni beddemma i yesseddan talγuγa almi i d-tewwed γer taggara-s. Tendeh temlilit s yiwet n lehrara i d-beggnen yimyurar n snat n trebbaɛ, d acu kan uqbel ad ikfu uhric amenzu, MCBgayet yessawed ad ijerred sin n yiswiyen mi akken ilmezyen n Guelma gguman ad awden γer ucebbak n Bgayet mi akken ineggura-a zgan llan deg lmendad yal mi ara d-tili zzedma sγur yixsimen-nsen. Uqbel akka ad yebdu uhric wis sin, d lwali n Tubiret, Mass Mouloud Chérifi i d-yewden γer tzeqqa n Rabah Bitat, yedda-d yid-s uselway n usqamu n twilayt. Akken kan ihi mi yebda uḥric wis sin, arraw n yemma Gouraya ceɛlen times deg unnar amezyan i wakken ad ssiwden ad rnun ukkuz n yiswiyen-nniden i wakken ad yawed leḥsab γer sdis(06) mi akken imyurar n Guelma wwḍen kan yiwet n tikkelt s acebbak n Bgayet. γas akka yeqwa lers daxel n unnar, maca fazen yimyurar s ubeggen n yiwen n leɛqel yeǧǧan timlilit tɛedda deg tegnatin igerrzen. Di lawan n taggara, d lwali n Tubiret i yettunecden i wakken ad yefk arrazen i yimyurar akked d teqbuct i MCBgayet i tt-yuklalen, imi rebḥen s wurar akked leɛqel.
M. Smail