S umezruy-is d ccan i tesɛa ɣur yal yiwen, tettwassen Yemma Guraya ula akin i yilel agrakal. Seg wakken tella d tigemmi yeswan n tmurt n Yizwawen, aṭas n yiberraniyen i d-irezzun ɣur-s teɣzi n useggas, aniɛad at-is. Maca, iban-d d akken leqder i tesɛa d tayri sɣur lɣaci ur yesḥerrek acemma deg yinesdabuyen n waɣir n Bgayet, ladɣa imḍebbren n uḥric n tmerrit. Imi lḥala ideg i d-teggra Yemma Guraya ass-a, yettaǧǧa kra n win iḥewwsen i yirebbi-s yettuɣal ul yendef s axxam-is. Ssebba n waya d ayen akk ur yezmir yiwen ad d-isugen deg wadeg am win i yellan d lemqam, d sellaḥ. Deg-s teqqnen iɣyal amzun d addaynin. Kra n medden rran-tt d abduz i useɛfen. S anida twalaḍ, ad tafeḍ iɣraben-is, ttwarun s yal asxerbubbec n win ikecmen ɣur-s ur tt-iquder. Iḍumman, ṭṭfen amkan d tɣemmar ad as-tiniḍ d agudu. War ma nemmeslay ɣef leḥyuḍ i yehtutin seg tuzzya n zzman, ur xemmen yimḍebbren ad as-ɛiwden areqqeɛ. « Hezneɣ aṭas mi rziɣ ɣur-s deg 2014, ufiɣ-tt deg waddad am win. Armi d ussan-a mi uɣaleɣ, ɣileɣ ad afeɣ yella-d kra n ubeddel deg-s. Maca d tuzzma kan i d-rniɣ i yiman-iw. Lemqam n Yemma Guraya, aql-it deg yir liḥala. Ur d-lhan yis-s wid-is ». Akka i aɣ-d-yenna M. K, yiwen seg wid iḥemmlen ad ẓuren Yemma Guraya seg tikkelt ɣer tayeḍ. Deg tallit-a n unebdu ideg ṭṭuqquten tirziwin ɣer wadeg-a iqedsen, yewwi-d ɣef yimḍebbren ad d-binen, ad as-rren azal i as-yettwakksen s ureqqeɛ d usizdeg.
M. K.