Mohamed Oudiai, d yiwen gar imeɣrasen imeqqranen i yefka udrar n Ait Aissa Mimoun, yesɛa azal d ameqqran deg tegrawla tazzayrit 1954-1962, ladɣa deg temnaḍt-agi n Ait Aissa Mimoun. Ulamma ur nesɛi ara aṭas n yisallan fell-as d yimuhal-is deg wakud-nni n lgerra, maca nra ad as-nexdem tajmilt swayen nessen kan fell-as. Ilul ass n 04 seg waggur n furar deg useggas n 1921 deg taddart n Tahanouts, yetabaɛen ussani-nni ɣer udewar n Djbel Aissa Mimoun. Yebda yettnaḍaḥ deg yiseggasen n 1940 deg Umussu aserti aɣelnaw azzayri. Deg useggas n 1948, yunag i tikkelt tamezwarut ɣer tmurt n Fransa. Syin ceggɛen-t yimḍebbren n tmurt i wakken ad ittekki deg unejmuɛ (congrès) n Bruxelles yellan deg tmurt n Lalman i d-yellan deg waggur n meɣres 1954. Ussan 29, 30 akked 31 seg waggur n yulyu1955, ittekki deg uheggi i unejmuɛ n Tahanouts i yuɣalen yettwassen s yisem n(Congrès de la Soummam) imi deg temnaḍt n Soummam i yettwaxdam ass n 20 ɣuct 1956. Ur ssawḍen ara ad xedmen deg taddart n Tahanouts, imi werɛad kfin anejmuɛ mi yewweḍ lexbar s irumyen. Deg tallit-nni, yella tama akked yimḍebbren n lwilaya tis tlata, yecban: Krim Belkacem, Amar Ouamrane, Yazourene iwumi qqaren (Briruc), Mohamed Issaid akked Bessalah Amar iwumi qqaren Amar n Baṣ. Syin akkin yuɣal d imḍebbar amezwaru ɣef tama n At Wagennun.Yettwanɣa sɣur yirumyen ass n 07 deg waggur n yennayer n useggas n 1957, tlata kan n yiseggasen mebɛed mi tendeh tegrawla n 1954, yeɣli deg unnar n umennuɣ deg tama n Isseklaouiyene deg lwilaya n Tizi Uzzu. Tajmilt i ssawḍen wat tmurt-is ad as-tt-ren d asemmi s yisem-is i yiwen d sin n yiɣerbazen imenza, yiwet deg Tikoubaine wayeḍ deg Ikhelouienne, akked tesnawit n tɣiwant n Ait Aissa Mimoun. Akked tira n yisem-is deg sin yisebdaden n yimeɣrasen yettwaxdamen, yiwen deg Thaguemount wayeḍ deg taddart-is Tahanouts.
Adaoun Abdelghani