Tedder tγiwant n Leɛğiba taggara n ddurt yezrin tiswiɛin n ccedda yessawḍen imezdaγ n kra n tudrin yerzan Buɛekkac, Lmedera d Uzru n Urumi ad medlen tiwwura n uxxam n tγiwant teγzi n tlata wussan, seg wass n ttlata almi d lexmis, i wakken ad d-beggnen lγid-nsen sdat lixsas n waman n tissit. Tasebḥit kan, uqbel ad awḍen yixeddamen, imezdaγ yuγ lḥal myefken ttiɛad i wakken ad qqiment tewwura medlent ahat wid akken i terza temsalt ad d-afen tifrat i uγbel ttidiren yimezdaγ-a. « Achal d aseggas-aya i nessutur aman n tissit. Ass-a, tewweḍ tfidi ɣer yiγes, ur nezmir ad nqabel taswiɛt s ttawilat-nne&gamma,; imi azγal yecban wa mazal-aγ nettaγ-d s wazal n 1200 n yidinaren tasitirt n waman. γer melmi ara tdum akka ? » D imeslayen i aγ-d-yenna yiwen n ubabat iγef d-iban reffu. Kra kan n lweqt γed tedyant-a n umdal n tewwura, imḍebber amenzu n ddayra yewwedḍ s amkan anda i yemmeslay d kra n yimdanen. Tigawt tamenzut d tuffγa γer unnar anda ddan yimḍebbren n tγiwant akked wid yettmeslayen s yisem n yimezdaγ. Asmi akken walan acu n ttawilat i iwulmen i taluft-a, uγalen-d γer tγiwant anda i d-yella umeslay d yimezdaγ yellan akka ttraǧun deg berra i yiṭij anda tiseddarin ufrarent nnig n 45°C. D acu kan, rray yettwaddmen d win ur qbilen ara yimezdaγ yettwalin d akken tifrat d tin ara iḍullen, dγa gguman ad slen i wayen i d-yeqqar ama d imḍebber n ddayra ama d imdanen yeddan s yisem-nsen. Dγa d yiwet n ccedda izaden, reffu yettban-d γef wudmawen, d ayen yeǧǧan imezdaγ n tudrin-a ad ṭṭfen deg rray n umdal n tewwura alamma yefra uγbel-nsen mebla leɛdil n watas. Azekka-nni, ulamma amɛellem i d-yelhan d usenfar n usiweḍ n waman ɣer yixxamen deg tudrin-a, yessaweḍ ttawilat ilaqen, yerna yewwi yid-s ixeddamen, imezdaγ ṭṭfen deg wawal-nsen, ugin ula ad ruḥen ad ẓren imḍebbren n twilayt. Awal-nsen ibedd γef yiwen n rray d akken ad swen aman deg lweqt wezzilen. γer lawan-a ideg nura isalli-a, mazal ccedda ur tefri ara, aṭas n tamiwin i yettnadin ad fsin tikerrist s kra n leryuy ahat ara yilin di lfayda n yimezdaγ-a yeffuden, akked yimezdaγ n tγiwant s umata yuḥwağen srabes n tγiwant i usufeγ n lekwaγed.
M. S.