Yerra uxxam n yidles Mulud Mɛemmri ass-nni n sem d sed 22 d 23 deg yulyu 2016 tajmilt i uzamul ameqqran n ccna Ccix El Ḥesnawi , s yiwen leqdic d anesbaɣur. Xedmen timsikent, timsizzelt, isefra d waṭas n leqdic imi d yiwen yestahlen tajmilt. Ilul Lḥesnawi ass n 23 deg yulyu 1910 deg taddart tameqqrant Taɛzibt deg yiḥesnawen deg lɛerc n Wat zmenzer n Tizi Uzzu. Asmi ila (yesɛa) sin yiseggasen temmut yemma-s , yekker-d ɣer twacult-is , s zawiyat d temɛamrin. Deg useggas n 1930, iruḥ ɣer Lezzayer akken ad yexdem , yuɣal yetteki d uzamul-nniḍen n ccna Lḥağ Mḥamed Lɛenqa ,( deg l’orchestre) , yesuffeɣ-d tizlit-is tamezwarut : «Ayemma yemma» , deg useggas 1936. Iruḥ ɣer Fransa, yeqqimen seg useggas n 1939 almi d tazwara n yiseggasen n 1950, uqbel tagrawla n 1954. Yessekles 29 n tezlatin s teqbaylit, 17 s taɛrabt . Ccix Lḥesnawi, d ameskar, d amedyaz (auteur/compositeur), d amẓawan ( musicien ), sɣur-s i d-ugmen yicennayen imeqqranen yecban Maɛṭub Lwennas d Ayt Mangellat d Kamel Mesɛudi. Yesɛa ṣṣut aḥlawan , aḥninan, win i as-yeslan i yiwet n tezlit-is, ad yessirem ad isel i tayeḍ. Acennay-nneɣ ameqqran aqbayli deg tezlatin-is, yecna ɣef wayen akk icudden ɣer tmetti d tmurt, yecna ɣef tayri, ɣef teqbayliyin, Ccix ameqqran, maca ugar n tezlatin-is yecna-tent ɣef lɣerba imi aɣrib ur yeshil ara fell-as ad yeğğ tamurt n Lezzayer aɛzizen : idurar n tmurt ; abehri n tmurt ; leḥbab d imawlan aɛzizen . Azamul n ccna Ccix Lḥesnawi, d agerruj ur nfennu. Yuweḍ umḍan n tezlatin-is ɣer 70. Yuweḍ leɛfu n Rebbi ass n 06 deg yulyu aseggas n 2002 , deg la Réunion, deg Saint Pierre , deg leɛmer-is 92 n yiseggasen, ad t-irḥem Rebbi , ɣas yeğğa-aɣ, yeğğa-aɣ-d .
Zakia Ben yahia