Ass-nni n ssebt, 23 deg yulyu 2016 i as-rran tajmilt tameqqrant i Dda Lmulud deg taddart-is, Tawrirt Mimun, deg tama n Wat Yanni. Tajmilt-agi, tella-d s lmendad n tɣiwant n Wat Yanni, Aseqqamu Aɣerfan n Lwilaya n Tizi Uzzu akked Tiddukla Tadelsant Talwit n Wat Yanni.
Aṭas n yimdanen i d-yerzan ɣer Tewrirt n Mimun i wakken ad ḥedren i tejmilt-a u ad walin asebdad i as-xedmen dinna i Dda Lmulud. Asebdad i d-yettwaxedmen deg tmurt n Lalman s ufus n n unaẓur Olivier Graïne, anaẓur n Wat Yanni, yettidiren deg tmurt-a. Gar wid i d-yusan ɣer din, ad d-nader Lounis Ait menguellet, Massa Bouchafa, Hocine Haroun, Slimane Hachi, Idir akked Malika Zayed, Mass Saiad, Dr Lahlou d wiyaḍ-nniḍen. Tikti n usebdad-a, tekka-d sɣur Mass Hocine Haroun i yellan deg lweqt-nni d aselway n useqqamu aɣerfan n Tizi Uzzu, d netta, dɣa, i iwelhen aseqqamu-agi i wakken ad d-yefk amelyar s wayes ara d-heggin leqdic-a. Tikti, tella-d seg yiseggasen iɛeddan, acu kan llan wuguren i d-yezgan mgal asenfar-a. armi d tura ‘’i d as-teččur’’, akken qqaren. Ma ɣef usebdad-a, yenna-d winna i t-ixedmen, Mass Olivier Graïne, » Ur bɣiɣ ara ad yili usebdad-agi am wid-nni-nniḍen, meḥsub akka kan. Ɛerḍeɣ ad as-fkeɣ rruḥ-nniḍen. Yers uwudam ɣef yiẓra, la yejjamaɛ tiwriqin i yewwi waḍu, ɣlint-d ɣef yirebbis. Yeṭṭef yiwet deg ufus-is i d-yessemneɛ seg wafug. Yeṭṭef-itt deg ucḍaḍ n ubernus-is.’’ Asebdad-agi yessmektay-d ansi i d-yuɣal uɣref-agi i qrib inegren.
Ma d Lounis Ait Menguellet, yenna-d ɣef leqdic-agi, ‘’ferḥeɣ imi udem n Dda Lmulud ad yeqqim i lebda s usebdad-a. Yal tikkelt mi ara nemlil deg leqdicat ɣef Dda Lmulud, yessmektay-aɣ-d lxedma n urgaz-agi i yellan d tigejdit n tsekla akked tɣerma-nneɣ. Dayen igerrzen leqdic am wa anda ara nettmeslay tamaziɣt s tlelli, d ta i d tajmilt tameqqrant ara nerr i Dda l mulud.’’ Seg usarag n tefsut n 1980 ar ṣmayem unebdu n 2016, tamaziɣt aṭas ay d-telḥa ulamma mazal ɣezzif umecwar. Anwa ara as-yinin ad d-yaweḍ wass anda ara ‘’tuɣal zzit s asɣar’’, ad teɛqel Faḍma argaz-is.’’ Aṭas, diɣ, i yesfuǧǧuɣen, ttɛassan kan wid i iqeddcen i wakken ad d-wwten deg-sen, tili nutni werǧin semlalen sin yisekkilen s tmaziɣt i wakken ad d-slalen aḍris, wameg tullist neɣ asefru, cafuɛa-nsen. Uɣalen am iqennan-nni, wiyaḍ la d-sufuɣen, nutni la ttwalin ma yella ‘’¨halal neɣ ḥaram’’. Yelha mi ara d-yili uskasi gar yimdanen, acu kan yif-it mi ara d-yini umdan ayen yelhan imi netta, ziɣ, yeẓra ayen n dir. ‘’Awal yeqqsed win yerḥa’’ i as-yenna uderwic-nni.
Hocine.Moula