Tura mi akka i d-ffγen yigemmaḍ n temsizzelt yerzan iselmaden imaynuten n uswir alemmas d tesnawit. Yettwaddem rray sγur teγlift n Usegmi i wakken ad d-yili usileγ n yiselmaden-a deg waggur n γuct i d-iteddun. Deg yiwen n ulγu i d-texdem tneγlaft n tterebga, tallit-a n usileγ ad tebdu ass n 19 di γuct, ad tdum 12 n wussan. Deg Tubiret, anemhal n Usegmi Mourad Bouziane, yefra-tt i wakken ad d-tili temlilit-a deg tesnawit Ouamrane n temdint n Tubiret mi akken yennejmaɛ d yimaswaḍen ara yilin deg lmendad i yiselmaden-a imaynuten. Dγa, uqbel ad d-yawed ttiɛad, yettwasbedd Abdennour Mohamed, yellan d amaswaḍ n tnebdalt n uswir alemmas d imḍebber n tallit-a n usileγ am wakken daγ i d-ttwaheyyan akk ttawilat iwulmen i waya. Ad d-nesmekti d akken deg yimalas yezrin i tekfa temlilit n usileγ n yiselmaden n uswir amenzu, imi nutni ur ten-terzi ara temsizzelt, wigi d wid i d-yulin seg lejrida n leɛḍil n temsizzelt n useggas yezrin. Timlilit-a i d-yellan deg uγerbaz alemmas Doubaissi n temdint n Tubiret, tessemlal-d 592 n yiselmaden.
M. Smail