Deg wussan-a n unebdu-a, uɣalen yimdanen ur ufin ara iman-nsen ɣef ssebba n waddad n tegnawt. Yal mi ara yesteqsi yiwen gma-s ɣef wamek yettili, ad as-d-yezwir s tririyin-a: « Yeḥma lḥal maḍi », «yečča-aɣ wurɣu », neɣ «yessefcel-aneɣ uzɣal-agi ». Imi teqseḥ n lḥamu, tettaweḍ alamma d ugar n 45 n tfesniwin. D lḥal ur wulfen yimezdaɣ n tuddar deg yiseggasen yezrin, ur zmiren ad rren taluft-is d wicqa kan. Ladɣa imi aɣamac am wa, yettḍurru tafekka n umdan, ama deg wayen yerzan ɛeyyu d faccal i d-yesnulfay, neɣ zzɛaf d tteqlaq i d-yettlalen weḥd-sen nnig lebɣi. Ɣas ma seg zik, yettaf umdan aman swayes itekkes, neɣ xersum yessenqas tidiwin i d-yettukkayen seg uzɣal, maca taggara-a, ur tent-mazal ara d isellaken deg tegnit-a. Di tegnit anda ula ma yebzeg uceṭṭiḍ ur ilaq ad yettwafser i yiṭṭij akken ad yeqqar, meɛna deg kra n temrac kan, ad t-tafeḍ yettwaskef yekkaw weḥd-s. War ma nettu, ad d-nebder ula d tagella i ixessren s lemɣawla ma yella ur temmečč, neɣ ur tettwaxzen daxel umsismeḍ. Yuɣ lḥal, ɣas ma aṭas n twaculin i yettḥewwisen ɣer teftisin anda sbennayent s tadfi abeḥri n yilel asemmaḍ, ttɛument deg waman-is akken ad ḥulfunt s tesmuḍi iɣef ttnadint, acu kan, idigan-nni ur qennɛen wid i irezzun ɣur-sen, skud ur tdum tɣimit deg-sen. Meḥsub, iban yal mi ara yuɣal yiwen s axxam-is, ad as-d-yeqqel uzɣal-nni amzun ur yeɛfis ijdi n teftist. Ula d imesbuḥruyen d yisnezwayen (climatiseurs) kkaten-d s lḥamu tikwal imi d win i ufan ad t-jebden.Yeggra-d ihi umdan, simmal yettwali timḍerrit s yezmer ad as-d-yeglu uɣamac i yettidir deg tazwara n tsemhuyt-a. Yerna send ad yesɛeddi ukuẓ n tmerwin n ssmayem i yettwassnen s teqseḥ d tuɛert n uzɣal-nsent i yugaren ussan-nniḍen n unebdu. Aya skud yella-d ubeddel deg tudert-is. Amedya, yuɣal ur yesbennay taguni deg yiḍ ɣef tmentilt n wurɣu i ihewwlen idammen-is. Lebɣi i tgella itekkes imi ḥala tissit n waman isemmaḍen i d-tessutur tɛebbuḍt s waṭas. Akukru ihi yebda yakan yettekcan deg yimdanen ɣef waddad-a n tegnawt i yugin ad ten-id-yessefreḥ s tɣelyawt n ugeffur, imi ala lehwa-nni i izemren ad treqqeɛ kra seg wayen ur nehwi i lɣaci.
Kaisa Khalifi