Ass-nni n lexmis yezrin 05 tuber 2017, i mden 29 n yiseggasen ɣef tedyanin n tnekra n 05 tuber 1988. Ffɣen-d yilmeẓyen n Bab Lwad deg Lezzayer tamanaɣt s iberdan, akken ad iẓẓifen, ad xedmen timesbaniyin, ad reglen iberdan…atg, i wakken kan ad ssiwḍen izen neɣ tmsalt-nsen ɣer uselway n tegduda Mass Chadli BenDjdid. D tabrat ideg ssuturen tifrat i ddeqs n yiɣeblan i iceɣben allaɣ n ugdud azzayri, kra n wayen ṭṭalaben nezmer ad d-nebder: tamuḥqranit d lbaṭel i d-yettilin ladɣa ɣef yilmeẓyen, leɣla n temɛict d yisufar n wučči, izerfan-nsen yettwarekḍen, izerfan isertiyen, tadamsa n tmurt…atg. Ma sseba tagejdant n tnekra-agi n yilmeẓyen-a, taṣebḥit n wass-nni n 05 tuber 1988, d asuter n ubeddel n tsertit iɣef tetteddu tmurt imir-n, ttnatin tugdut, tilelli n umeslay, n uxemmem, n tira…atg. Imi walan belli teɛya tallit-nni n ukabar awḥid, d netta kan i yessedduyen tamurt. Ulamma ilmeẓyen-agi ur sɛin ara kra n umrig neɣ leslaḥ swayes ara wwten, ara nnaɣen, maca d taflest d leḥmmala n tmurt-nsen i ten-yeǧǧan ad wwten swayen sɛan d afud akked tezmert, i wakken ad d-gren tiɣri i yilmeẓyen n temdinin-nniḍen akken ad ddun deg ubrid-nsen. Syin akkin, amennuɣ yuɣ akk tamdint n Lezzayer tamanaɣt, bdu-tt-id seg ubrid n umeɣras Diduc Murad, Lebyar, Lḥarrac…atg. Din din, yemmeɣ umennuɣ deg ddeqs n lwilaya-nniḍen timeqqranin, yecban: Tizi Uzzu, Wehran, Annaba, Qeṣenṭina, Ṣeṭif…atg. Tendeh tmes deg yiberdan, d ayen i d-yeglan s tukci n ttesriḥ i lɛeskkar n tmurt i wakken ad d-yeffeɣ ula d netta s iberdan azekka-in n 06 deg waggur n tuber 1988, i wakken ad iseɣsi times iceɛlen deg wulawen n yilmeẓyen, i iqublen s yidmaren-nsen rrṣas n lɛeskkar, uggin ad uɣalen s ixxamen-nsen bɣan ad kemmlen amennuɣ alamma wwḍen lmerɣub-nsen. D ayen i d-yeglan s lmut n waṭas yilmeẓlyen d waṭas n yimejraḥ, akked tlalit n tmendawt tamaynut n 23 yebrir 1989, i d-yeffɣen s wudem unṣib ass n 05 yulyu 1989. Aṭas n yimdanen i iruḥen d asfel n tlelli, n tugdut, d teɣdemt…atg. Maca mmuten tamettant n yimeɣrasen n tmurt, d imeɣnasen n tugdut d tlelli. D ayen i d-yeglan s uɛiwed n tmuɣli deg tsertit n tmurt, d lebni-ines ɣef tugdut i iṣeḥḥan. Deg kra n wagguren kan, tbeddel tmendawt n tmurt n Lezzayer, dɣa fkan ttesriḥ i yimdanen i wakken ad d-slalen ikabaren isertiyen-nniḍen tama n ukabar awḥid seg 1962, ad d-xedmen tiddukkliwin tisertiyin, yal amdan yesɛa azref deg unejmuɛ, deg tmesbaniyin, deg uneḥbus ɣef uxeddim (grève) . Dɣa deg kra n wussan kan, bdan ttefruruxen-d ikabaren isertiyen imaynuten, s wakka i tuɣal tmurt n Lezzayer d tamurt tagdudant i tikkelt tamezwarut deg umezruy-is. Deg useggas n 1995 aṭas n leǧridat n yikabaren-agi ijdiden i d-yenulfan i ittekkin deg tefranin n tselwit.
Ghani Amazigh