Iweǧǧiben, d ansay aqdim ɣer leqbayel. D ass amenzu n tyerza ɣer yifellaḥen , ttmagaren-t medden s lfuttuḥ n lxir, ssaramen ad yelhu useggas n tyerza am wakken sfiliten ad yili lxir d ṣṣaba deg yigran.
Gar wayen xeddmen lejdud, suffuɣen izgaren, ad tezwir tyuga n uxxam At lxir n taddart, ad teddu tmeṭṭut tameqqrant n uxxam, ad tawi aɣerbal deg-s remman, ibawen, tajilban, irden, tazart d lmesbaḥ. Ad dehnen tagersa, ma d arrac, ad ṭṭfen deg ufus n tsilet s umata. Akka i d-yettili uɛeǧǧeb di tmurt n leqbayel. Imezdaɣ n taddart n Teslent di tamnaḍt n Ṣsumam, di tɣiwant n Yiɣram, llan gar wigad uɣur i d-yeqqimen wansay-agi, mazal ṭṭfen deg-s. Ass-nni n lǧemɛa 27 di tuber i weǧben, muggren ass amenzu n tfellaḥt. Amek i d-yella uweǧǧeb di taddart n Teslent? Ddurt uqbel aweǧǧeb, deg unejmuɛ n taddart, ad msefhamen wat taddart i wakken ad d-ssufɣen tirbuyin n seksu ubisar ɣer umraḥ n taddart iwumi qqaren « Sidi Abd jlil d uɛetman». Ass n yimensi n yiweǧǧiben, yal axxam ad d-iniwel seksu n temẓin neɣ n yirden, ma ulac d smid , abiṣar, ad yili d asafar agejdan. «Nebɣa ur yettmegrad ara nwal gar uxxam d wayeḍ, acku iswi–nneɣ d ajgugel deg wansayen n lejdud, mačči d timsizzelt gar yixxamen anwa ara ad d-iniwlen a xir n wayeḍ», i d- yenna Mass Ali Abassen, d amezdaɣ n taddart. Imi d-yewweḍ lawan-nni n usečči, mlalen-d wat taddart? win-d tirbuyin n ubiṣar, llan wid i d-yusan ula si berra n taddart, ttidiren di temdinin, gar-asen, ad naf Mass Buyusef i d-yusan seg Uqbu nnig n 70 n yiseggasen-aya i yezdeɣ di temdint, maca yal mi ara ad d-tili tegnit am tagi, yettas-d igellu-d s tarbuyt-iw, imi i t-nesteqsa yenna-k : « D tignatin am tigi, tettuɣ abɛad ɣef taddart, d akal d wansayen n lejdud i yi-d-yessawalen yal tikelt, rnu ttawiɣ-d arraw-iw i wakken ad myussanen d wat taddart, aẓar yettabaɛ tara…». Imensi ass n yiweǧǧiben yessemlal-d arrac, tiqcicin, imɣaren ilmeẓyen di Teslent. : «Nessaram d ass ara yesduklen cmel, wa ad teqqiment laɛwayed i tsutwin i d-iteddun, acku d nutni ara ad tent–ikemmlen» i d-yenna Mass Iskounen s yisem-is d aselway n tidukla tafrara.
B. Benhamouche