Tameṭṭut tamcumt tenna-as i yelli-s: – Mi tewwḍemt ad testaεfumt, ddmemt ad teççemt, ḥader anida i as-tettakeḍ aman ad tsew alamma tekkes-am-d tiṭ-is, ilaq d kem ara yaγ ccix!. Tiqcicin ṭfent abrid γer taddart n ccix, leḥḥunt, leḥḥunt, leḥḥunt ar almi εyant, ḥebsent ad staεfunt, ddment ad ççent, yiwet teddem-d ad teçç ayen i as-tefka yemma-s di mkul lxir, ma d tayeḍ teçça cwiṭ deg uγrum-nni amerγan. Tuγal tenna-as: – A weltma, efk-iyi ad sweγ cwiṭ n waman. Tenna-as: – Ur am-ttakeγ ara alamma tekkseḍ-iyi-d tiṭ-im. Tenna-as: – Ah! A weltma ad iyi-tefkeḍ d taderγalt γer tmurt n medden?!. Tuγal teqqim cwiṭ tessuter-as daγen cwiṛ n waman. Tin terr-as-d am tikkelt-nni tamezwarut. Taqcict tameγbunt tcaḍ si fad ur tezmir ara ad tesbeṛ. Tekker tekkes-as-d tiṭ-is, tefka-as aman, ula akken ur tt-teǧǧi ara ad terwu. Kemmlent abrid-nsent, lḥant ddeqs, uγalent ḥebsent, ddment ad ççent, tagujilt-nni teçça daγen seg uγrum-nni amerγan ; tuγal tessuter-as i tikkelt niḍen ad as-tefk ad tsew, taqcict tugi. Tenna-as: – Ur am-ttakeγ ara alamma tekkseḍ-iyi-d tiî-nni inem tis snat. Taqcict tameγbunt tekkes-as-d daγen tiṭ-nni ines tis snat. Lḥant akken, tin ur tettwali ara abrid. Leḥḥunt ar almi wwvent γer yiwet n teẓgi, tekker Σica tessegrareb weltma-s, ma d nettat tkemmel abrid-is γer taddart. Tewweḍ deg yiḍ γer uxxam n ccix, tenna-asen: – A yat wexxam nekkini d weltma-s n umeksa. Dγa skecment γer uxxam. Ma yella d ultma-s nni tettegririb, tettegririb almi i d-teṭerḍeq deg uxxam n yiwen n ufeḥḥam. Akken i tt-id-yufa ufeḥḥam, yewhem, yenna-as: – A tamexluqt-agi d acu ara txeddmeḍ dagi weḥdem?!. Taqcict teḥka-as-d taswiεt amek i tella, tessuter deg-s ad tt-yawi s axxam. Argaz yugi ad tt-yawi, yenna-as: – Sεiγ snat n tlawin deg uxxam, lukan ad kem-awiγ yid-i, ad aγ d-wwtent s teqjemyaṛ. Taqcict tettḥellil deg-s ar almi i tt-yewwi. Akken yewweḍ γer wexxam, yekcem kan wtent-t-id tlawin-is, nnant-as: – Nekkunti di snat ur d aγ-tezmireḍ ara terniḍ tis tlata!?
Tettkemmil seg tgemmi n teqbaylit