Ayen yerzan tifranin n Ugraw aɣerfan n twilayt n Bgayet, ideg i d-rsen merra yikaramen (dossiers) n 14 n yikabaren, d akabar n Tirni n yiɣallen inemlayen i yeglan s tuget n yikersiyen i tikkelt-nniḍen, am deg 2012, imi yewwi 21 seg-sen. Deffir-s, srid d RCD i d-iḥellan si tama-s 10 n yikersiyen. Ayen i d-yeqqimen yebḍa ɣef ukabar Ilelliyen (Lwaḥi ad nebnut imal) 5 n yikersiyen, d FLN 7 n yikersiyen.
Yuɣal yebrez-d FFS deg Ayt Smaɛel
Ass n amhad iɛeddan, 23 deg unbir, aṭas i yekkren d lḥers seg 19:00 d asawen mi yebda ufran n tsendyaq n lvuṭ, bdan ttbinen-d yigemmaḍ n tefranin tidiganin. Deg tɣiwant n Ayt Smaɛel, i tikkelt tis ukuẓ i d-yufrar s umur ageɛmir ukabar n Tirni n Yiɣallen Inemlayen deg uqerruy-is Sadeq n Ayt Urbaɛ, s 7 n yikersiyen yessaweḍ iḥella-d tuget, sdat RND 4 n yikersiyen, RCD 2 yikersiyen, FLN 2 nniḍen. Ulamma ur llint tsewham ɣef FFS ɣef tmuɣli n yimezdaɣ n Ayt Smaɛel, meskud yennum yettawi-d tuget, ma d akabar n Hmed Uyeḥya, aṭas-aya ur as-d-isaḥ deg Ayt Smaɛel umḍiq i as-d-isaḥen lexmis-a. Ula deg tɣiwant n Tsexriwt d akemmel i d-yellan. Yewwi-tt i tikkelt-nniḍen s tuget ukabar n Ugraw i Yidles d Tugdut s 5 n yikersiyen. Ḍefren-t-id Yilelliyen n Sidani s 4 n yikersiyen, 2 i FFS, 2 i FLN, 2 nniḍen i ukabar n TAJ. D akemmel dɣa i d-yellan ula deg tɣiwant n Yiderginen imi yuɣal yebrez-d din ukabar n FFS.
M. K.