Gar 1 541 n tɣiwanin i yellan deg tmurt n Lezzayer, yezga-d ukabar FLN d amezwaru deg 603 deg-sen s wazal n 30, 56% akked 711 n yikersiwen deg usqamu aɣerfan n lwilaya (APW).
Deg umḍiq wis sin, yella-d ukabar RND i yewwin 451 n tɣiwanin s wazal 26, 21% akked 527 n yikersiwen deg usqamu aɣerfan. S wakka i d-zgan sin yikabaren-a deg yimekwan imezwura deg tefranin-agi tidiganin am tikkelt-nni yezrin deg tefranin n usqamu aɣerfan aɣelnaw anda i yewwi ukabar FLN 161 n yikersiwen, ma d RND 100 n yikersiwen. Deg umḍiq wis tlata, ad naf Front El Moustakbel s 71 n tɣiwanin s wazal n 6,2% akked 131 n yikersiwan deg usqamu aɣerfan n lwilaya. Syin, yerna-d ukabar MAP i d-iḥellan 62 n tɣiwanin s wazal 5,9% akked 68 n yikersiwen deg usqamu aɣerfan n lwilaya. Ma d akabar MSP, yella-d ɣef uqerru n 49 n tɣiwanin s wazal n 4,92% akked 152 n yikersiwen deg usqamu aɣerfan n lwilya. Akabar n FFS i d-yuẓen ciṭ ɣer sdat, yella-d d amezwaru deg 64 n tɣiwanin s wazal 3, 92% akked 63 n yikersiwen deg usqamu aɣerfan n lwilaya. Ma d akabar n RCD i iwexren ciṭ, iḥerra-d 37 n tɣiwanin akked 33 n yikersiwen deg usqamu aɣerfan n lwilaya. Tikkelt-a, ad yili d aselway n usqamu aɣerfan n tɣiwant umezwaru n wumuɣ i yewwin aṭas n leswat deg tefranin. Ma llan sin yimezwura kif kif-iten deg leswat, ad yuɣal d aselway n tɣiwant umecṭuḥ deg leɛmer deg-sen. Azal n 180 000 n yimdanen i d-ibeddel, tikkelt-a, ɣer tefranin-agi. S umata, ɛeddant tefranin deg tegnatin igerrzen ɣef wakken i d-ibeggen uneɣlaf Nourdine Bedoui xas ulamma llan-d 690 yicetkiyen. Yewweḍ wazal n wid yekkan deg tefranin-agi ɣer 46, 93% deg tɣiwanin, 44, 96% deg usqamu aɣerfan n lwilaya. Ma nger tamawt ɣef tefranin-agi n tikkelt-a, ad naf llan kra n yikabaren uẓen ciṭ, ma d wiyaḍ wexren ɣer deffir. Xas ulamma llan yikabaren i d-yewwten deg tefranin-a, acu kan amur ameqqran walan d akken ɛeddant akken iwulem u qeblen igemmaḍ, neɣ ɛad ferḥen yis-sen.
H. M.