Ɣef ttlata n ṣṣbeḥ i yeṣṣuni rrabay ! Muḥend yellan werɛad yeṭṭis yelwawec mi as-yesla. Yewhem amek i yeṣṣuni rrabay win akken werǧin iɛemmeṛ ahat ɛeddan qeddac n yiseggasen aya. Netta acḥal n yiseggasen aya ideg yettu ssaɛa, yettu akud s timmad-is. Taswiɛt akka usant-id yisekta, isekta n temẓi, ladɣa asmi akken yetḥemmes ad yelmed ssaɛa tin akken werǧin yesɛi. Imiren d tixulal n yimcac i yesrusay ɣef ufus-is, yettṛaqab deg-sent melmi ara dewwṛent. Yemmekta-d ussan-nni asmi i yeɣɣaṛ, asmi i d-yettnekkar tafejrit s leḥṛaṛa i wakken ad iṛuḥ ɣer lkuliǧ. Imiren d netta i d-yezeggirin rrabay, yettekkar-d uqbel ad yeṣṣuni s wacḥal.
Taswiɛt akka, yenṭeq ɣer yiman-is yenna-yas: I iɛeddan fell-ak ay ixef-iw, yerna mazal ur temmuteḍ ! Ncab uqbel ad numɣuṛ, meqqeṛit uqbel ad ncab ! Zgant tirga-nneɣ ɛekksent imi di ṭṭlam i neṛǧa tafsut armi i teǧǧuǧeg ur tt-nwala ara. Tura d ayen kan tirga ḥebseɣ-tent, ssaɛa ttuɣ-tt, aḥun Ṛebbi kan yella lkif iss ttṣebbiṛeɣ ul-iw ; ɣas ma ɛemdeɣ tazmert-iw ad tt-isum meɛna ufiɣ-t d amwanes.
Muḥend, ur iḥar ara mi akken yeṣṣuni rrabay, ɣas yeẓṛa d ayen yessewhamen imi mačči d netta i t-iɛemṛen, meɛna netta i wumi teffeɣ leḥṛaṛa acu n lfayda yesɛa ma inuda ɣef sseba ?
Netta di tidet, d yelli-s n gma-s tameẓyant i yesfentewcen di rrabay-nni mi as-t-yefka ad turar yes-s, ziɣen nettat tɛemmeṛ-it mebla ma tfaq. Mi as-t-imud akken yenna-yas : Ax-n ad tbeṛneḍ deg uṛeqqas n ṣṣeḥ, s anda i am-yehwa tawiḍ-t, meqqaṛ ad tlemdeḍ amek ara tjiriḍ lweqt-im akka d tameẓyant mačči am nekni umi teɛkes aqlaɣ neffeɣ-d d uɛwijen ugar. Asmi i nella annect-im, nɛelleq zzheṛ-nneɣ deg texlalt n umcic, neɛya nettṛaju deg-s anda ara terr ma d asawen neɣ d aksar armi i aɣ-teqqim akken d tannumi nettenququl, negra-d neṣṛuḥ taflest deg wakud ar lexxeṛ-nneɣ. Muḥend di leɛwayed-is ur yeggan ara di lawan-nni, yufa-tt meqqaṛ d sseba i wakken ad yetmeɛɛen ɣef wayen icudden ɣer wakud. Yettmeyyiz, yettxemmim ɣef lweqt ɛlaḥsab n wayen yessen. Imiren bdan ttadfen-d ɣer wallaɣ-is lemɛani icudden ɣer lweqt : Ass, azal, iḍ, aseggas neɣ awettay, ssmana, agur, tasemhut, tanezzayt akked tmeddit, ssaɛa, dqiqa, asukund neɣ tasint,… Yuɣal yenṭeq ɣer yiman-is, yenna : Ismawen-a akk icudden ɣer wakud neɣ lweqt, d imdanen i ten-isemman akken ad ggen lxilaf ger teswiɛin, akken ad neḍmen tudert-nsen, ad qeɛden tiktiwin-nsen icudden ɣer yisekta-nsen d yimahilen-nsen : Luleɣ-d ass leflani, ttiɛad ad yili dduṛt leflani, ɣef ssaɛa leflani,…atg. …/…