Deg tɣiwant n Ayt Smaɛel, i yeggugen s wazal n 60 n yikilumitren ɣer Unẓul-asamar n Bgayet, tebda iseggasen-a ineggura, tettgerriz lḥala n yiberdan. Abeɛda segmi ttwadlen s ugudrun akk yiberdan iɣiwanen deg-s, am win n Tɛinsert, Tigratin, Lmerj Iɣil, neɣ daɣen Taregragt, Bumejber d Burafaɛ. D ayen i d-yewwin kra n rraḥa i wulawen n yimezdaɣ i yuɣalen sseqdacen akken ssaramen iberdan-nsen. Seg tama-nniḍen, yella yiwen n ubrid i mazal ttraǧun tummda-ines yimezdaɣ n Ayt Smaɛel am teslit yettraǧun ayyur-is; wa d abrid aɣiwan n Tecruft. Ulamma mi yettwaldi yessefreḥ ddeqs n yiɣermanen imir-nni, imi i t-sseqdacen tugart-tugart i trewla seg uḥras n ubrid aɣelnaw wis 9, maca tura, ttraǧun war ssber melmi ara yettwadel merra-is akken ad tishil fell-as tikli. Imi ad d-nesmekti belli, seg wakken yella kra n umecwar seg-s iwumi ur yemmug uguḍrun, ddeqs n tkerrusin i iḥesslen din mi ara d-asent seg Uweqqas neɣ seg Kefrida. D ayen i ten-yettḥettimen, ad uɣalen ansi i d-kkan, ad bedlen timesreqt. « Abrid n Tecruft deg tegrest-a, llan kra iɛawen-iten, llan wiyaḍ uhu. Ula d amihi yezga yella deg-s, tugart deg lemsaq n ubrid-nni iwumi ur yemmug uguḍrun. Ilaq ɣef tɣiwant-nneɣ, ad t-teg gar yiɣeblan imezwura akken ad yamed uwenneɛ-ines ». I d-yenna yiwen n umezdaɣ n Ayt Smaɛel. Seg tama n tɣiwant, ɣef wawal n yiwen seg yimḍebbren-is, ur ttɛeṭṭilen ad as-kemmlen i ubrid-a imi aql-it di ddhen. Ma mačči aseggas-a, ad d-yili waya tazwara n 2019.
M. K.