Ḥala sin-a n wudmawen n tsertit i d-yerran i tiɣri n wid i d-iheyyan timlilit-a tameqqrant; anda yetturaja ad d-asen aṭas seg yimmetlen n yikabaren ama d wid yeddan d leḥkem neɣ d wiyaḍ.Timlilit teḍra di tzeqqa n yisaragen n ulammas adelsan Meεtub Lwennas n umezduɣ 17 di tuber n tesdawit n Bgayet. Amezwaru iwumi yettunefk umeslay d Moussa Touati, yewwi-d awal ɣef umezruy n tlalit n FNA, ɣef leqdic-is di tudsiwin n warraw n ccuhada yecban ONEC d CNEC. Syin akin yekcem srid deg usentel n tallit yellan d tifranin n 09 di yebrir i d-iteddun. Da yessefhem-d akk sebbat i t-yeğğan ad izeddi di lbuṭ n tselwit; deg wawal-is yenna: « Azeddi di tefranin d lwajeb n yal yiwen imi d tagnit akken ad yesbeggen umdan leḥmala-s i Lezzayer; yerna lbuṭ d yiwen ttawil n umennuɣ s talwit, yes-s ara d-ibeggen yiwen rray-is mgal adabu. » Ula d Karim Tabou yesmekta-d i wid iḥeḍren amezruy n tlalit n ukabar n FFS yerna daɣen yewwi-d awal ɣef tikli tagrewliwt n uselway-is Houcine Ait Ahmed. Deg wawal-is yewwet-d s leqseḥ deg udabu i yessemrasen kra wudmawen n tsertit akken ad εeddint tefranin: »Adabu-nneɣ seg wasmi i as-d-necfa ixeddem ddikur i tefranin akken ad yefk udem n tugdut ɣer berra ». Γef wakken i d-yenna, azeddi di lbuṭ d lexdeε i ccuhada d yimeɣrasen n tugdut. Yesserwes tiɣri n FFS i lbuykuṭ ɣer wayen i iga Abane Ramdane deg tallit n tegrawla, anda i yessawel i yizzayriyen iεemren tisquma n tedbelt n Fransa akken ad jebden iman-nsen. Mi kfan awal-nsen, yebda uskasi; tuget n yisteqsiyen i d-fkan yinelmaden i Moussa Touati; rzan akk azeddi di tefranin n 09 yebrir. Di tririt-is ɣef yiwen n usteqsi yerzan tamaziɣt, mass Moussa Touati yenna: « Nekni tamaziɣt nga-yas amkan deg ahil-nneɣ,; iswi-nneɣ d asbeddi n tkadimit ara yettkeflen s useggem n tutlayt-a d uselmed-is i akk izzayriyen ». Ma d Karim Tabou yenna-d ɣef temsalt-a: « Tamaziɣt ɣur-nneɣ,; d ayen icudden ɣer umennuɣ ɣef tugdut. » Azal n 3 n tsaεtin i tekka temlilit-a, ɣer taggara sin-a n wudmawen mbadalen sslam ɣas ma yal yiwen seg-sen yeṭṭef di tikti s.
Mokrane Chikhi