D akemmel deg ubrid i d-wwin yiselmaden n tmaziɣt si 2007 ar ass-a: « aselmed n tmazight s tarrayt tasnedwelt s yisenfaren (méthode de la pédagogie de projet) », amecwar mazal-it ɣezzif, aḍar iteddu akken yal aselmad ad t-id-isaḥ uzref ad yili di timliliyin ara d-yawin awal ɣef tarrayt-agi d yiswiyen-is. Maca tikelt-a, azref-agi yettunefk i wazal n 120 n yisdawiyen n useggas wis 4 n usuddu n tmaziɣt. I tikelt tamezwarut i d-tella temlilit am tagi ɣef teɣzi n 4 wussan, si 21 ar 24 di meɣres, di tesdawit n Mulud Mεemri. I usmekti kan, d amaswaḍ n tmaziɣt Mass Ali Bexti d ugraw n yiselmaden n tmaziɣt i d-iheggan timlilit-agi. « Γas ulamma, nuɣ tannumi akked yiselmaden kan i nesqerdic asenfar n uselmed n tmaziɣt, tikelt-agi, mi nxulef, iswi-nneɣ d aheyyi n yisdawiyen-agi ɣer uselmed s tarrayt-agi. Timlilit-agi riɣ d tazwart ara asen-yefken tikti ɣef tarrayt-agi i d-yewwin amaynut yelhan ama i yinelmaden-nneɣ ama i yiɣerbazen-nneɣ.» i d-yenna Mass Ali Bexti.
Djamila Ahitaghel