Taceqquft n umezgun i wass. D wa i d awlelleɣ (rythme) i d-yewwi uxxam n umezgun n Bgayet, akken ad yessedhu arrac, deg tallit-a n yiɣimi n tefsut. Seg tceqquft “Fufu d Lulu” ar tayeḍ “El bernus Sseḥri”. Seg tẓuri n terbaɛt n Ğelfa ar tayeḍ n Berğ Menayel. S teɣzi n 15 n wussan, axxam umezgun n Bgayet, ur yebri i yiɣallen akken ad d-iheyyi leqdic ideg sfaydin warrac, deg tegnitt-a n tɣimit n tefsut n yimeɣrayen. Omar Fetmouche iga-d tagnit-a akken kulci ad d-yuɣal i warrac. Am tmeslayt am turart. Imdewlen lsan, kecmen deg tḥedduft n warrac. Γas akken tazeqqa tameqqrant n uxxam n umezgun mazal ur tfukk s ureqqeɛ,; anemhal ur yebri i yiɣalen imi tella tzeqqa tameẓẓyant. Ur icuḥ ara deg wallalen akken ad d-yesmekti Bgayet, belli amezgun yuɣ amḍiq deg-s. «Imezdaɣ n Bgayet gren acḥal-aya azeṭṭa d tẓuri tamezgunt. Nekni, nɛerreḍ akken nezmer ad d-nerr iseqqan ɣer waman. La d-nettleqqim ɣer ubrid n leqdic, tisuta i d-yettenkaren», i d-yenna Mass Fetmouche. Γef lxetyar n tegnit yeftin seg 19 deg meɣres armi d 03 deg yibrir, massa Wahiba Kadi, yettkelfen s wahil tenna-d : «Tal tallit n tɣimit n warrac yeqqaren, neskura-d akka ahil i nutni. Tamezwarut, tella-d deg wussan n tɣimit n tegrest. Tayeḍ d ta, tella-d deg tegnitt-a n tefsut.» Ma d lxetyar n trebbaɛ d tceqqufin, Wahiba Kadi, terna-d awal: «Ccɣel amezwaru sway i nextar tirebbaɛ ara d-yuraren d win usentel (sujet) n tceqqufin-nsent i d-sulint ɣef usayes (scène). Ilaq ad isenned ɣer usegmi (éducation) qbel kulci. Umbeɛd nexdem akken ad kkint trebbaɛ n tal tamnaṭ n Lezzayer. Usant-d seg Djelfa, Bordj Menail akked tin n Bgayet. Nenced-d daɣen yiwen n useḥḥar. » Arrac, mi d-ffɣen, ɣer taggara n tceqquft, gellun-d s wul yemmed s wayen ḥulfan. Wa yefreḥ ta tecmumeḥ. Ta tettru, iɣaḍ-itt Lɣabi. Ugar aya, tid d wid yeddan acemma deg leɛmer, sqerdicen awal, am wid yeskasayen ɣef usentel. Neɛna, tilemẓit Faṭima, nesteqsa-tt ɣef tceqquft i twala: «D yiwet n tcixett, tesɣaray 10 n warrac d ibessalen… ». Tegzem-as awal tameddakelt-is Meryem: «Xaṭi, d nettat i ten-yesheblen!… » Wayeḍ yenna: «Nniɣ-am d Lɣabi i t-yewten…»… « Xaṭi. I s-d-terra tayeḍ. D mmi-s n tissist i t-yewten… ». Salas, am urgaz yegzem-asent awal: «Xaṭi, d tacixett-nni diri-tt, mi tewwet Lɣabi.». Gar-asen teffeɣ-d yiwet n tlemẓit tettru: «Nekk, ur bɣiɣ ara mi yesruḥ useḥḥar-nni afrux…». Ata amek tezri tallit. Yal ass s tmucuha sway d-glant tceqqufin. Am trebbaɛ am tceqqufin, tal ta s tewsit-is. D aya i d-yernan deg ccbaḥa i wahil n tegnit. Ismawen yemdewlen ttwaxtaren-d ilmend n warrac “Lɣabi, Mmi-s n trisiti, Beccar lxir, Afenyan…”, akken daɣen imdewlen, yal wa yeskan-t-id yisem-is. Tal tarbaɛt, turar-d taceqquft i d-tebna s talɣa-ines. Tal ta anta tadyant i d-tessefti i d-tessuli ɣef usayes. Ma d asentel-nsent d tirni, yeɛna asegmi. Tirebbaɛ i d-yulin ɣef usayes, llant tid yennumen, llant tiyiḍ d timaynutin. Maca ayen yelhan gar-asent, msaɛadent; ta tmudd afus i tin ixussen neɣ i t-id-isutren. S teɣzi n 15 wussan, axxam n umezgun yeldi tiwwura i warrac. Kulci yuɣal-d i warrac.
Ait Ighil Mohand