Mi ara nebdu taɣuri deg ungal « Aεecciw n tmes » i tura Lynda Koudache, i d-yeffɣen sɣur tiẓrigin « Tasekla » di yennayer–agi n 2009, ad d-nḥullef, mebla yakk ma nessakked ɣer wanwi i d bab-is, d tameṭṭut i d-yellan di lmendad n wawalen yeččuren adlis-agi. Di tifyar yuzzlen deg wungal, ad d-nemlil akk d tutlayt n tmeṭṭut akked yiḥulfan-is reqqiqen i aɣ-yettawin srid ɣer tassa-s, ɣer lbeḍna-s.
Ungal-agi, yettawi-aɣ ɣer tmeddurt n tyemmatin-nneɣ i d-yekkren ddaw talaba n lḥif d wurfan. Tiyematin-nneɣ yelḥan deg yiberden n lmerta d yiɣilfen. Tilawin-nneɣ yessnen d acu i d akessar d acu i d asawen, nutenti yeswan di tbuqalt n lemrar i d-tesres zdat-sent tudert ur nettcuḥ,; ur nettbud.
Γef wacimi « aεecciw n tmes » i d tansa n wungal agi ? Lynda Koudache, tenna-d : « Deg uεecciw kan i tella lεefya i d-yesemliliyen iεeggalen n twacult, ɣer tama lkanun din kan i tettun askuṭṭef n laẓ,; din i zeggin iɣeblan n wul ». Ma yella deg wacu i temgared tira n tmeṭṭut ɣef tin n yirgazen ? Lynda, terra-yaɣ-d : « Akken yebɣu urgaz yewwi-d ɣef tmeṭṭut, yeεreḍ ad yekcem di ssura-s, ur yezmir ara ad yidir am nettat tuqqda n-tirget yeskenfan lejwareḥ-is. Ala win yettewten i izemren ad d-iḥulfu s uknaf i yuzzan tasa-s. Ur cukkeɣ ara yezmer ad yazzel wawal ɣef yiles n urgaz am wakken ara yazzel ɣef win n tmeṭṭut, imi ulac win izemren ad yesfru lqerḥ n tallest am nettat s timmad-is »
Lynda d tamyarut tamezwarut i yuran ungal s teqbaylit, aya yesεa azal meqqren, imi akken i as-yenna Kateb Yassin : « tameṭṭut yettarun, tettwaktal s uwreɣ ». Lynda, teldi-d abrid i wungal n tameṭṭut s teqbaylit, asirem-is am wakken i d aɣ-tenna : « Amer yal n win neɣ n tin izemren ad yaru naɣ ad taru s tutlayt-nneɣ,; yernu sεan d acu ara d-inin, ad kecmen s tehri ɣer wannar n tira, imi ala s ubrid-agi ara nressi taqbaylit deg wulawen d wallaɣen n yimdanen » « Aεecciw n tmes » d ungal yettwaɣren s tuget n tumert, lebɣi amer ad yeɣli gar wamur ameqqran n yimeɣriyen, akken ad yuɣal wawal n Lunis Ait Menguellet « zik wa ihedder-itt i wayeḍ,; ass-a di lkaɣeḍ,; ad tt-id-afen yineggura » d tilawt mačči d targit kan. Akken qqaren ayen yelhan yelha, ayen yelhan tewwi-d ad as-nneg azal !
Aεecciw n tmes
Sɣur Lynda Koudache
Tiẓrigin : Tasekla
163 tawriqin.
Ait Slimane Hamid