.10 yiseggasen n lḥebs i win yettwatehmen s wezraε n lkif
. Aneḥbus yettwaserɛen
Axxam n creε n Bgayet
10 yiseggasen n lḥebs i win yettwatehmen s uzraε n lkif
S tmara i yessaweḍ jjuj n temlilit akken ad yefsel di taluft n uzraε n lkif d uznuz-s i ideg ttutehmen watmaten B. di rebεa yid-sen.
Timlilit-a, i d-yeḍran larebεa iεeddan, tekka nnig xemsa swayeε. Aya yella-d s sebba n lixsas n ttbut rnu ɣur-s 13 yinagan i d-icehden atmaten-a xḍan i ttehmat i asen-sbubben.
Tettuɣal taluft ar wass n 29 deg tuber 2008 anida ijadarmiyen yellan yakan ttnadin ɣef wid izerεen lkif di taddart n Aguemoune (taɣiwant n El Kseur), εlaḥsab n yisallen i ten-yewḍen ssawḍen ad afen lkemya d tameqqrant n uεeqqar-a zdat n uxxam n twacult Boudah. Aya yella-d mi ẓedmen ɣef taddart-a wuǧuh n setta n tsebḥit, amezwaru i yeṭṭfen d B. M., ufan ɣur-s tadrimt s lqidar n 13 melyun suntim iḍegger-iten segmi i ten-iwala, netta yellan d afellaḥ εlaḥsab-is n wayen i d-nnan yinagan, yella iteddu am lεada-s ɣer ssuq n Amizour akken ad yaɣ lmal ad ten-yezzenz.
Mbeεd aqelleb ufan tacekkart teččur d lkif, tettwaffer ddaw n teḥfirt n ukermus i d-yezgan 10 lmitrat ɣer yidis n uxxam. Am wakken daɣ i d-skeflen sin n yibettiyen ččuren d asafar-a deg umkan i ibeεden 200 lmitrat ɣef tmezduɣt n twacult-a, rnan ufan ɣur-sen asenduq i yemmugen i usrusay n tmegḥelt mebla ma sεan ttesriḥ.
Ayetmaten-a i yettwatehmen, twasnen di taddart xeddmen tafellaḥt deg tlata yid-sen, ma d wis rebεa ixeddem di lakul n taddart d acu yettεawan-iten teswiεin di lecɣal-nsen. Aṭas seg yinagan i d-ineṭṭqen seg wid i asen-yefkan lmelk-nsen ad t-txedmen, nnan-d akk di leεmer ssuksen-asen-d neɣ cukken deg-sen, imi εlaḥsab-nsen, zerrεen lxeḍra yecban lbaṭaṭa, llubya meεna d lmuḥal walan di lmelk-nsen imɣi yesεan assaɣ akked lkif. S wakka, yettwasenqed uneqqis n yijadarmiyen s ssebba n lixsas n ttbut. Ladɣa ɣef tneqqiṭ-a iɣef rekkẓen s waṭas yibugaṭuten n temḥaddit ɣas ma aprukirur amatu yessuter s lεuquba meqqren i rebεa-yi n watmaten.
Γer tagara, jjuj yeḥkem kan s 10 n yiseggasen n lḥebs i B. M. d lexṭiya s lqidar meqqren ma d tlata-nniḍen yeεfa-yasen.
Snat n tlufa icuban ɣer ta ara iεeddin deg ussan d-iteddun. Yiwet terza azraε n lkif d uznuzay-is ad tili i wass n 25 deg mayu 2008, ma d tayeḍ terza asuffeɣ n uεeqqar-a ɣer tmura n lberrani i wass n lḥed 31deg mayu ɣef 9 n tsebḥit.
Mokrane Chikhi