“Ma tenniḍ-d ad temteḍ,; ma tessusmeḍ ad temteḍ,; ini-d temteḍ.” Aniwa ur nesqerdec ara awal-agi i d-yeffɣen deg uɣmis Rupture, lawan-nni ideg yeḥma useqqi di tmurt n Lezzayer ?
Tahar Djaout, imi d netta i d-yeǧǧan awal-agi, iqubel taswiɛt s wudem n tira d tikta iwakken ad yessaki wid iɣeflen ɣef “Tsunami” i d-yejban fell-aneɣ. Azrem-nni i d-yetturebban yuɣal d talafsa, iger-d ad yexlu tamurt, yessemsed ajenwi ad ifak imusnawen d wid iferẓen timsal.
Tahar le clairvoyant, yeẓra acu i t-yettraǧun. Ifures tagnit iwakken ad d-yini uqbel ur ifut lḥal. Yak ula d Lounis yenna-d : “Neɣ xtir ǧǧaɣ-d awal ara iɛicen deg umkan-ik”.
Kenza-nni yeggujlen, ur tettru ara imi baba-s d asfel i yeɣli ɣef tmurt-agi. Wid iqemḍen rruḥ-is ttagaden imeslayen-is ar ass-a. Ẓran ahat ayen yekseb mačči d aqerru yeǧǧa wallaɣ,; ur yeqqin tacacit, ur yebri i ubernus. Γer melmi i tezmer Lezzayer ad d-tesɛu wayeḍ am netta ? D acu kan, ayen yettuɣaḍen d akken mi ara yemmet yiwen n umusnaw am wagi s ufus n win “yesṭenṭunen” deg uzzal. Mačči d astehzi s lxedma n yal yiwen, maca ma ɣaben yimusnawen, aniwa ara yesseddun timsal ? D acu kan, imesḥaf-agi ɣas neqḍen acḥal d itri, igenni ur inegger ara. Ulamma iɣab Tahar, imeslayen-is teddun, tteftutusen deg unnar. D udem-is i iɣaben !
M. Smail