Ilmend n waggur n remḍan, agerzu n Tizi Wezzu yefka-d lemɛawna i lfayda n tɣiwanin, gar-asent taɣiwant n At Zikki iwmi d-fkan 42 tqecwanin ideg ara naf awren, zzit, ayefki, laḥda, leɛdes, lḥemmes, rruẓ,; lqahwa, ssker, bermisal, tumaṭic n tbewwaḍt. Maca, taɣiwant n At Zikki tesɛa ugar n 42 twaculin yenxessen, ur zmirent ara ad ɛeyycen iɛegallen-nsent acku isufar n wučči zaden deg ssuma, tecɛel tmes deg leswaq, xersum deg waggur-agi n remḍan.
Γef waya, aselway n ugraw aɣerfan aɣiwan (APC) n At Zikki, Mass Meẓyan Ɛmara, yeɛreḍ amek ara yessefreḥ yal tawacult yenxessen, dɣa yerna-d 56 tqecwanin ideg yella akka ayen iwulmen. S waya yessaweḍ ad yefk lemɛawna i 98 twaculin. S wakka, imḍebbren n tɣiwant n At Zikki seḍsen yal tawacult yenxessen yellan niqal tettru, skecmen lferḥ s ixxamen.
Islam Bessaci
