Mbeεd mi d-iwekked ɣef tidet n uselmed n tεibrit, aselway n tesdawit-a Dr Abdellah Boukhalkhal yerna-d deg awal-is : “Aseggas-a daɣen, ad yili uselmed n tmaziɣt i yinelmaden n tesga n userwes gar ddiyanat. Aya, ad yili iwakken ad tennerni tmusni-nsen deg yidles amaziɣ i yesεan assaɣ akked tneslemt. Idles-a d win yellan s yak tantaliwin yemxalafen ama d taqbaylit neɣ tacawit neɣ tumẓabt neɣ tmacaɣt”.
Rnu ɣer waya, yesmekta-d s lamer i d-yessufeɣ uɣlif n leqraya εlayen deg useggas n 1999. Lamer-a yettwessi s uselmed n tutlayin ticerqiyin akked tid n tmura timselmin yecban tafarsit akked taṭurkit ; yuɣ lḥal qqaren-tent yinelmaden n tesga n umezruy n tesdawit n Lezzayer. Ma d aselmed n tmaziɣt yewwi-d ad yili ugar n wakka imi d tutlayt taɣelnawt mačči d taberranit.
Mokrane Chikhi