Simmal zerrin wussan, ttlalent-d tlufa i yesseεwaqen tudert i yemdanen. Aya, neẓra-t deg wussan-a iεeddan deg Aswel i d-yezgan di Tikjda. Annar iɣef yettuserref acḥal d adrim atan yettwahmel, ad d-tiniḍ ur yesεi imawlan. D amkan i d-yezgan di leεli n wazal n 1678 lmitrat iwulmen i yinaddalen, fkan deg-s afus, ǧǧan-t i lmal. Deg unebdu-agi iεeddan, acḥal n yimdanen i iqesden amkan-a i usgunfu d umerreḥ. D acu kan, nnulfan-d wid yettfarasen tignatin, sersen-d leqwanen. S kra n win ara iḥebsen takerrust ad ixelles tabzert n 50 yidinaren. Imi ur yelli win ara iḥasben wigi, ulamma aɣmis-nneɣ ur yekbil ara timsal-a, tennulfa-d tin iɣelben aya. Amkan yettwaxedmen i waddal d tazzla, yuɣal i tkeryas ! Ur ḥezben, ur gin azal i umkan-a, skecmen tikeryas-nsen, sselmaden wid i wwin yid-sen di tenhart. Wiyad, tturaren ddabex n uḍar anda ur iwulem ara. D tiɣri n waṭas n yimdanen i wid terza taluft iwakken ad gen tilisa i twaɣit yecban tagi, ahat ayla n César ad yuqal i César.
M. Smail