« Nessaram ayen i aɣ-weɛden lhekkam-a nneɣ, ur yettɣimi d awal, am yal aseggas. »

Tameɣra n tazart, yebdan deg useggas 1997, deg tɣiwant n At Imɛuc, tuɣal d lɛadda i yimezdaɣ-is. Dɣa, neṭɣar ɣer Unes Abdelḥeq, amaray n tdukla yinfarasen (producteurs) n tazart n twilayt Bgayet, akken ad ɣ-d-yemmeslay acemma ɣef tmeɣra-ya n tazart d lecɣal i as-d-yezzin :

– Amek i d-tlul tikti n tmeɣra ɣef tazart ?

Tikti n usuddes n tmeɣra tamezwarut n tazart, teḍra-d deg useggas 1997, tekka-d sɣur aselway n tɣiwant. Yenced-aɣ deg tallit-nni, nekni s yifellaḥen ; azal 80 tdukliwin. Nemcawar amek ara neqdec lecɣal.

– Anda i tsersem tura tameɣra-ya. D leqdic deg yidis adelsan neɣ adamsan neɣ n tfellaḥt ?

Akken wala&#611,; nezmer ad d-nini tsenned ɣer yidisan-a merra. Γef wayen yeɛnan aḥric adelsan : imdanen ttẓurun-d ar da ɣer temnaṭ-a nneɣ ; akken daɣen i yella uselmed n wayen yeɛnan tazart : ttwalin medden belli tazart truḥ d taɣara (qualité), tella deg-s tufrint yettnuzun s ukilu, tella taɛemriwt, tella taɛulit tella. Ma deg yidis adamsan, nezmer ad d-nini tameɣra-ya tuɣal d ass n lbiɛ-wecra n tazart i yiberraniyen i d-yettasen ama seg Lezzayer tamaneɣt, ama seg Sstif, Tizi Wezzu…

– Leqdic-a, yekcem deg P.P.D.R.I ?

Yella wayen i d-tewwi tmeɣra. Ad awen-d-fkeɣ amedya n 11 yittaftaren i tqeddem tɣiwant-nne&#611,; atna deg lbirru n Lwali. Iweɛɛed-aɣ mi d-yusa ɣer tmeɣra i s 11 ad ttwaqeblen.

– Deg useggas ar waye&#7693,; tameɣra tettuca&#603,; armi tuɣal aseggas-a tagraɣlant. Amek i ten-d-tessnem ?

Di tazwara, lfeḍl yuɣal i nutni. D nutni i d imezwura i aɣ-inecden ilindi ar la Normandie. Aseggas-a, mi nemmeslay d Uxxam n tfellaḥt di Bgayet, newwi-d ttesriḥ akken tidukla-nneɣ ad tent-tenced. Acu d-wwin d amaynut ? Seknen-aɣ acu merra xeddmen s tazart hah d lmeɛǧun, hah d učči s uksum, hah d tiziḍanin…

– Awal aneggaru ?

Nessaram, kra wid i aɣ-d-iẓuren ufan ayen ttrajun. Akken daɣen ara nessirem ayen i aɣ-weɛden lḥekkam-a nneɣ ur yettɣimi d awal, am yal aseggas.

Mohand Ait Ighil