Deg yimalas-a yezrin, taɣiwant n Bechloul yellan yakan tettidir yiwet n liḥala n timcukkal gar yiɛeggalen n tesqamut-is, tedder yiwet n tedyant ur d-nefki ara asirem i yimezdaɣ-is. Aya, yella-d s twakksa n tefles (confiance) i yimḍebber amezwaru n tɣiwant-a sɣur 6 yiɛeggalen n tesqamut. Ihi, am wakken msefhamen gar-asen, 3 seg wid n ukabar n Moussa Touati, 2 seg ukabar n Ahmed Ouyahia yiwen n FLN ffɣen-d s yiwen rrabul anda i d-beggnen s wudem unsib tukksa n “ṭṭmana” i lmir n tɣiwant iwumi sbabben aṭas n tlufa seg-sent leɛḍil n usnerni, aseddu n temsal melba lemcawra, … Timlilit-a teḍra-d melba ma yella win akken i terza temsalt, akked sin seg yimdukal-is i d-yufraren deg tfernin ddaw leɛnaya n ukabar n Said Sadi.
Tagnit iɣer tessaweḍ ass-a tɣiwant n Bechloul d tin ara d-yeslalen melba ccekk aɣbel ameqqran, win ara yesɛeṭṭlen ugar lecɣal di temnaḍt-agi.
Si tama-nniḍen, am waken yella di lqanun, leqyada ad tuɣal kan i RCD, imi d netta i d-yewwin aṭas n leswat. Ayadra, wid yestenyan leɛqed-agi ma ad qeblen daɣ win ara d-yalin neɣ ad kemmlen di lḥers-nsen ɣef terbaɛt yettmettilen Said Sadi ? Ar ass-a, taluft attan gar yifassen n lwali n Tubiret, i mazal ur tt-yegzim ara di rray.
Lḥasun, akken tebɣu teffeɣ,; ala imezdaɣ n Bechloul ideg ttrusunt tyita n umennuɣ ur nesɛi lsas. Ziɣ win iɛerḍen tacriḥt n tsekkurt ur iqenneɛ ara !
M. Smail