D yiwen n uneγmas n timuzzeγt d tugdut akked yizerfan n umdan di Tegzirin Tiknariyin. Ilul di temdint n Laguna deg useggas n 1930,yelmed di tesdawit n temdint-a yellan di tegzirt n Tinirif armi i d-yeffeγ d abugaṭu deg useggas n 1956. Asmi yakan i yella d anelmad,yettnaγ γer yidis n yixeddamen d wid akk yettwaḥeqren. Syin,yuγal yeslul-d amussu yessuturen s timanit n Tegzirin Tiknariyin i yas-d yewwin taεdawit n udabu n Spenyul. Di tallit-nni,aṭas seg yimdukal-is i yettwaṭfen γer lḥebs,ma d netta yerwel. Deg useggas n 1964 yeslul-d amussu-nniḍen,tikelt-a yessutur s uzarug n Tegzirin-a timaziγin γef tgelda taspenyulit MPAIAC. Iswi agejdan n umussu-ya d: »Timunent n tegzrin,lebni n tmurt εlaḥsab n tumast tamaziγt n yimezdaγ-is Igwanciyen(Guanches) i mazal heddren s tmaziγt ar ass-a ». Antonio Cubillo,yusa-d γer tmurt n Lezzayer deg useggas n 1968. Adabu azzayri n tallit-nni,yeǧǧa-t ad yeqdec s tlelli,yefka-yas yiwet n nnuba di rradyu taγelnawt umi isemma: »La voz de Canarias libre »(Taγect n Teknariyin tilelliyin). Di tallit-nni daγen tettunefk-as tegnit ad yemlil ineγmasen izzayriyen yecban Mouloud Mammeri. Deg useggas n 1978,mbeεd lemsalḥa i d-yellan ger leḥkem n Lezzayer akked win n Spenyul γef temsalt n Sseḥra Umalu,mass Cubillo yuγal γer tmurt-is. Din wten-t s rsas yiγallen n laman,γas ma tezgel-it tmettant,meεna tiyita i t-iḥuzan teǧǧa-yas-d tirẓi i lebda. Segmi i teḍra twaγit-a,amussu MPAIAC yextar abrid-nniḍen n umennuγ,;d amennuγ imselleḥ. Acu kan ḥebsen tilufa deg useggas n 1979,seg yimiren ttnaγen s tin n talwit. Deg useggas n 2003,taγademt n Spenyul testeεref s lγelṭa i yexdem udabu asmi i yewwet s rsas mass Cubillo. Fkan-as-d leγrama yellan d lḥeq n yidammen-is yuzlen di lbaṭel,rnan setεerfen s umussu-ines. Ameγnas Antonio Cubillo,mazal-it ar ass-a yettkemmil amennuγ ilmend n tlelli n umur-a εzizen n wakal n Tmazγa,iqeddec daγen deg ayen yeεnan idles,amezruy d tutlayt n ugdud Agwanci Amaziγ.
Mokrane Chikhi