Cukkeɣ teḍra-yaɣ,; nekni s Leqbayel, am wid « yekkaten aɣyul, ddarayen tabarda » neɣ «am lmal mebla ameksa». Yefka-yaɣ-d Bab n Yigenwan iles d aɣezzfan: nettmeslay kan, lxedma ulac, tira ulac. D acu n lfayda ma nenna-d taqbaylit d tutlayt mačči d tantala?!! Nessen ad tt-nemmeslay?! nessen ad tt-naru?! Nezmer ad tt-nesselmed?! Tzemrem ad tt-idirem yes-s?!!!
Deg tazwara, ur lliɣ d amazzag (spécialiste), ur tellam d imazzagen n tutlayt akken ad nemmeslay ɣef temasalt-a. D acu, yewwi-d ad d-nessegzi kra n tektiwin d timenza. Tin i d-yufraren deg-sent, d tin yerzan wid yettmeslayen s tefransist, ttraun s tefransist ɣef teqbaylit. D lɛib fell-asen, ur ilaq ara akk ad mmeslayen ɣef temsalt-a. Yewwi-d fell-asen ad beddlen tikli. Issinem amek ttmeslayen, amek ttarun s teqbaylit. Syin ad awaen-d-binent temsal, amek llant d wamek i ilaq ad ilint. Tin i d-yeṭṭafaren, d tamsalt n tutlayt neɣ tantala “taqbaylit”. I wid i d-yeqqaren taqbaylit d “tutlayt”. Ur teẓram ara acḥal n teqbayliyin i yellan?! Anita ara teddmem? D tasaḥlit? D tin n Sumam!! Ahat d tin n Tizi neɣ tin n Tubiret!! Yak mxallafent? Neɣ ur teẓram ara!! Tfehhmem-asen i Yisaḥliyen mi ara d-ttmeslayen? Yak d imezdaɣ n Bgayet, d Leqbayel ula d nutni.
Ayen i zemreɣ ad d-iniɣ,; Leqbayel ass-a, mazal ur as-ɛeddan ara ɛad i «dualisme» i d-yeǧǧa Aflaṭun. Mazal ur d-neffiɣ ara ɛad seg “la petite et la grande”, “ssef n wadda d ssef n ufella”, tura rnan-aɣ-d “tutlayt d tantala”. Ayen i ilaq ad t-xedmen, ur t-xdimen, ur cukkeɣ ad t-xedmen sya ɣer sdat.
Ad d-kfuɣ tifyar-iw, s wayen i d-yenna Matub: “uqbel ad aɣ-ɛezzin s ttwab/ kkret ad d-njab/ isufar i tdukli-nneɣ”
Abrid yessufuɣen, ur (mačči) d abrid n tmeslayt “ladɣa s tefransist”, d abrid n tira s tutlayt-nneɣ. Deg taggara, “Taqbaylit d tutlayt mačči d tantala” mačči d ugur akken ad naẓ ɣer sdat. Mačči d ugur i Timanit ay nessutur.
Md u Remtan, d anelmad deg tesdawit n Bgayet