D ayen yessefraḥen, imi tiɣri i d-iger uɣmis n yimaziɣen ɣef taluft yerzan wid yettaɣen abrid ameqran Asammar-Amalu i d-ikeččmen s abrid aɣelnaw wis-5 di tama n Leɛǧiba tufa tamezzuɣt. Aya nettwali-t deg wussan-a yezrin, imi iɣallen n laman, lɣesker d yiǧadarmiyen, llan deg umkan-a i d-nebder s wudem unṣib. Ilaq kan ad d-nesmekti belli, aɣmis nneɣ,; yessaweḍ-d yiwen n yisalli n utɛeddi, deg yiḍ,; n kra n yimdanen ɣef yiwet n twacult i yettrajun ad rekben di lkar. Ula d lmir n tɣiwant-a yemmeslay-aɣ-d ɣef tafat ur nettwexdem ara deg umkan-a. Deg umeslay-is, imḍebber-a yenna d akken, ma neǧǧa liḥala akka, ur yettɛeṭṭil ara umḍiq-a ad yuɣal d tamazirt n yimxenzen. D acu kan, iwulem ahat ad nger tamawt ɣef wamek i d-tella tririt i teɣri. Iɣallen n laman ireṣṣan dinna d wid yellan yakan di Bouaiche, acḥal d aseggas aya. Tura imi d-gguǧen, nugad ad yuɣal umḍiq-a d aɣen d lfinga, imi zik, dinna i ḍerrunt twaɣiyin n yiberdan. Ayadra, tura imi teǧǧan yiɣallen n laman, ma d ttkal i tteklen belli ur d-itekk ara seg-s lmeccaḍ ?
M. Smail