Aɣerbaz alemmas n tullas i d- yezgan deg tɣiwant n Larebɛa Nat yIraten yuɣal d temezduɣt i wazal n 19 n twaculin i t-ikecmen deg zlezla n 21 mayu 2003. Ugur- agi d win iceɣben lɛamma ladɣa imḍebbren n tɣiwant, acku asmi i tewwet zlezla ur d-banent ara tmezduɣin yenṭerren, tiwaculin- agi i ikecmen aɣerbaz berra i lqanun ur ccetkant ara imiren ɣer yimḍebren. Ad d-nesmekti belli zlezla n 2003 tḥuz ladɣa ddaira n Tigzirt d Tedmait, ma d tiyaḍ ur d-yelli leḥsab nsent ger tamiwin yenṭerren. Ad nerr lwelha belli taɣiwant n Larebɛa Nat Yiraten d tin ideg yella lixsas meqren deg wakal n lebni, ilemend n waya, imeḍebren n tɣiwant ssutren aṭas n tikkal lwilaya iwakken ad taf tifrat i wugur-agi, maca ar ass-a acemma ur d-iban. Ad d-nesmekti belli aɣerbaz- agi d win yettwabnan deg tallit n Fransa anida yella d sbiṭar, mbeɛd timunent n tmurt yuɣal d amkan anida ttnejemaɛen warraw n ccuhada, syin ɣur-s yuɣal d aɣerbaz alemmas, aya uqbel ma ad t-kecment twaculin-a i t-izedɣen. Ma d imḍebren n tɣiwant, nitni bɣan ad t-rren d aɣerbaz i uselmed n lḥirfat. Si tama nniḍen, ad naf tiwaculin- agi i izedɣen deg uɣerbaz- agi aqdim ččetkint ɣef teswiɛt n diri ideg ttidirent am wakken i ssuturent azref nsent n tmezduɣt ladɣa imi amkan- agi d win yenṭerren, tarwa nsent tettili-d tugdi fell-asen. Deg taggara, ad d-nini belli, ugur n lixsas n tmezduɣt d win yerḥan imezdaɣ n tɣiwant n Larebɛa Nat Yiraten icuban timnaḍin nniḍen, ɣas akken tesfayda-d s yiwen n wahil n lebni n 390 n tmezduɣin deg wahil n lemɛawna n lebni n tmezduɣin n tudrin.
Dalila I.