« Ih a mmi, ssunna twulem, imi yeggugem ! » Aṭas n yimeslayen yecban wigi i nsel yal ass deg rreḥba n lmal. Aseggas-a, akraren ssemɣin-d afriwen, almi ad tenwuḍ sɛan “les options”.
Ilmend n lɛid ameqran, yal talmat tuɣal d ssuq, imdanen ttruḥun d tiqufya, izamaren mačči d kra, lameɛna ur d-banen wid yettaɣen. Aseggas-a, ama d wid yettrebbin lmal neɣ ahat imetjaren, rran talast I ssuma tamejṭuḥt am tin n “Le SMIG”. Ulac s ddaw n 15 000 n yidinaren. Seg Tubiret alamma d Ccerfa tɛeddiḍ ɣef Bechloul, ad d-tiniḍ yella kra n win I d-yefkan lamar ɣef wamek ara nzen wakraren. Ɣas akken ggten deg rreḥbat, wid ara yaɣen ttuɣun seg leɣla, wid ara yessenzen ttmeslayen-d ɣef umɛic n yiɣersiwen-a d wanda yewweḍ deg ssuma. Ass-a, win yesɛan iɛeggalen ur yezmir ara ad d-yaɣ s ddaw n sin n
20 000 n yidinaren, ma d tawacult ara yawḍen nnig n 10 n yiɛeggalen, ulac fell-as awal: Xas ad d-iheggi bab-is 3 n yimelyunen ma yebɣa ad isewweq.
Aṭas n yiseggasen I iɛeddan, tewweḍ teswiɛt ɣer wanda tella ass-a, maca imdanen zzin s agerruj I d-ǧǧan lejdud. Timecreḍt d tin kan I yettselliken lemwaḥal. Tura, ur iban sɛan medden idrimen neɣ ahat gguman ad leqmen insayen. D acu kan, akken I s yenna winna di lemtel: Mi tɛedda tmeɣra, ad neḥseb iwzan.
A. A