AUssan- a yeqwa zhir, ggten imeslayen. Anda ma teddiḍ awal itezi ɣef wemqejjem d-yellan gar ukabar n RCD d umeqran n lḥukuma. Netta yenna-d, nutni nnan-d. Nutni fkan-s taɣect, netta yesuli di ṣṣut. Deg leḥwari, deg yimakwan n uxedim lɣaci ttemesteqsayen : « kecmen waqila yedrimen ɣer lbusṭa ? Lɛid atta-n teqreb-d, yernu la qqaren idrimen ulac… A tin n yixef-nneɣ ?
Yugget wawal, Ḥanaci d Rwawra ttemyuzamen. Wa yeqqar i wayeḍ d keč i yeskiddiben. Wahruḥu yekker, deg unnar yuli uɣaber. Anwi ara yedriblin wayeḍ ? Di leqhawi, ɣef yeṭruṭwaren ilmeẓyen jaḥen. Kra ssedhuyen iman-nsen s duminu, kra ttektilin abrid s wallen ur asen-d-yiban sani ara rren.
Yekket uhetwir deg yeɣmisen, yal wa amek la yeffetu. Acu-t wakka yakk la d-yettlalen ? Naɣ mazal tifranin ur d lḥiqent-ara ? Ayen akka yekker umendayer gar wigi akked widak ? Tiyammatin tthuzunt aqerru ɣef lbaṭata yufgen di leswaq deg yimensi n lɛid ! Yenza wulac ! Irgazen ɛewwqen ansi ara s-kken i yikerri -nni reɣben xas ur ksiben azal-is. Yessufeɣ-d uwazɣi timajatin-is !
Tasusmi n yiḍ, wis ma d-ter yal yiwen ɣer lɛaqel-is ? Ur yelli win yeẓran deg akken terwi lmisa. Awal netta yeẓra tewweḍ-d tedwelt-is, yal wa la yesemsed deg yilles –is akken ad yaf ifyar s wacu ara yeqazem ixṣimen-is. Ma d lɣaci, aqlileḥ ur ten-yeffiɣ, ur sen-yebri. Ayefki ziɣ ulac ! akkin zdat ukumersi yeḍra-d wemederkel. Tibbuciḍin n uyefki ttafgent deg yigenni, nzant uqbel ad rsent ɣer lqaɛa. Yal wa mi yewwi ayen i d-iḥeṛa s ljehd n yiɣil-is, yezzi s axxam s tesusmi. Ɣer wigi yezga yebkem wawal. Ziɣent ula d awal iga taneḥiyaft, yessen anwi i d yilsawen ɣef ayeg i iḥmel ad yazzel !
Zemmem qemmem…i wumi timenna, ticki yejla wawal ɣer wid ur ten-nessin ? Zemmem qemmem… ayen tasusmi ticki awal iɣ-ibeden yecba
amqenin ?
Zhir, i d-yekkan nnig-as d zhir. Widen yeẓran snen-as i zhir d tikli, ma d wid yeseɛzeg.. yuɣ lḥal uɣen tannumi !
Ait Slimane Hamid