Mbeεd zziyarat i yexdem yakan lwali ajdid n lwilaya n Bgayet mass Hamou Ahmed Touhami,γer waṭas n ddayrat d tγiwanin yettabaεen Bgayet,ddurt iεeddan yerra lwelha-s γer tama n usammar n lwilaya.Deg yiwet n tirza i iga akked yinemhalen yemxalafen n lwilaya γer ddayra n Souk El Letnin,mass lwali yefka tameẓẓuγt i yimezdaγ i yas-d-yemmeslayen γef wuguren-nsen deg yiwet n temlilit i iga yid-sen lawan n tulya i tikelt tamezwarut n uxxam n yilmeẓyen n tγiwant n Tamridjt(60 km γef ddayra) i yekfan s lxedma.Di tγiwant-a daγen,mass lwali yessefqed lecγal n lebni n yiwet n temkerḍit ideg ttwaserfen yakan wazal n 750 melyun n ssuntim.
Am wakken daγen,imḍebber-a amezwaru n lwilaya yeẓra-d aṭas n yisenfaren deg tγiwant n Souk El Letnine d tγiwant n Melbou anda i yewεed imezdaγ d yesquma iγiwanen s lxedma ilmend n ukemmel n yisenfaren ladγa wid yerzan iberdan am lecγalat n ubrid aγelnaw u°43 d yiγerbazen d wadegen izuyaz-nniḍen.
Mokrane Chikhi
Bgayet
znuzuyen lkif d likaci
Ddurt yezrin,ṭṭfen yiγallen n laman di temdint n Bgayet yiwet n terbaεt n yilmeẓyen yeznuzayen lkif d likaci.Iγallen n laman mi ṭṭfen tlata seg yilmeẓyen-a(wis rebεa yerwel) deg ukartyi n Mohammed Medjahed i d-yezgan di temdint taqdimt,ufan γur-sen:lkilu n lkif d wazal n 361 n tkaciyin.Ilmeẓyen-a yesεan di leεmer-nsen,ger 35 d 40 n yiseggasen,sεeddan-ten yiγallen n laman γer lewkil n tigduda i d-yefkan lamer s uḥbas-nsen,ma d wis rebεa yellan yerwel, yeffeγ-d mgal-is lamer n uqelleb di leεḍil ad εeddin di creε.
M.C