Salem Ɛemṛan ilul ass n 27 di Ṭuber 1966 di taddart n Asi Yusef deg Lwilaya n Tizi Wezzu. D amedyaz, d amaru s teqbaylit akked d tefṛansist. Salem yella diɣ d aɛeggal di SPF( amezday n yimyura n Franṣa) si 2002,yettiki ɣer SGDL( amezday n yiwaziwen n tsekla n Franṣa) am akken diɣ yella d aɛeggal n la SACEM.
Ammud n yisefra : « Susmet la neqqen iwecriḍen » yeffeɣ-d sɣur tizrigin « Richa Elsam »deg aggur n Ṭuber 2010. Tazwert n wammud- agi tella-d sɣur Nicole Barrière.
Susmet, la neqqen iwecriḍen ! Akkin i usirem, yella usirem i d‑yekkan nnig n usirem, xas ma ɣef leḥwaci n yiberdan mejden llufanat, ttrunt lxalat, jegḥen yibabaten. Laẓ d lḥif ur d -ǧǧin nnuba i nnif. Yemderkel lmeɛqul ɣef tiddarit n tisselbi. Ihi ssusmet, la neqqen iwecriḍen !
Xas akken d targit i d- tger targit akken ad aɣ tesselhu, aɣurar ur yezmir ad yeskew imɣan deg luḍyat n usnulfu, afellaḥ yezzuzuren awal di tebḥirin n tsekla ur yendel ur yemmuɣben. Xas ulamma d targit, Iferriwen ɣef neǧren wawalen werǧin ɣlin ɣef yisekla yecban idlisen. Ijẹǧǧigen ṭṭfen nmara i taɣart ! Xas ma d targit kan i d- tettawi targit, leṣlah yettawin di lǧeṛṛa‑s lmut yettwanejmeɛ, azref irebba igduden, imdanen ddan deg ubrid n tayri, nawlen leḥmala. Ihi, xas susmet la neqqen iwecriḍen !
Fiḥel a yiṭij ad telseḍ talaba n yiɣisi ! A yiṭij tettecruruqen di tignaw ur nerkid, yiwwas ad twalid ijewwiqen n lhu ssedhuyen tiwkilin n tmenna di tẓegwa n laman. Fiḥel a yiṭij ad telsed talaba n yiɣisi, fiḥel ad yemmundel yiẓri‑k, yiwwas tamuɣli‑k ad tcerreg ilem yeččuren rreḥba akken ad teskefleḍ timeqwa n tmusni iɣaben d lesnin aya. Fiḥel a yiṭij ad tismiḍed, yiwwas ad teǧǧuǧeg tefsut, ad terr tahuski i wussan yeẓẓan deg uḥarruq. Susmet la neqqen iwečriḍen!
Tikli tettawi ɣer lebɛid, tettarra-d ɣer tama yeccehwa wul n yal amdan yeggunin liser di tebḥat deg tecrurudent tidmiwin, tiden i d‑yuǧwen lemɛani d yinumak seg tizzumna n yimusnawen. Xas ulamma urǧin yufa wul tallit tgerrez-as amḍiq i leḥmala, tasa tedeggir ifergan akken ad telli tawwurt i uṣeḍru n tafat akken ad iɛeddi. Ulac tagnit i tayri meskud yennuɣni yixef, meskud ḍulen yimeṭṭawen, meskud hulen yiɣilifen. Ulac tagnit i tumert meskud hajen yitran deg yigenni, meskud ddan deg ubrid n timhujrit, kecmen di tɛeǧǧaǧt ur nettaǧǧa leɛqel di lɛeql-is. Deg wakud yecban wagi, tikli tettawi cbiha n unemṭar ur nessufuɣ. Tikli tettuɣal d anadi ur d- nettawi, tettuɣal d azuzzer n leɣrur. Susmet, meskud neqqen iwecriḍen !
Llan yisefra, tella tira. Yella umedyaz, tella tmedyzat. Awal yensex ɣef uglim-is ifyar n lebda, widen yeǧǧan nnuba i tikti. Suɣen wawalen, cgen ɣef lkaɣeḍ, rran tikti d tiɣri, tin yesengugun taɣzint, tin yesduqqusen lxaṭer, akken asuter ad yuɣal d tagrawla mgal iṣeggaden n tmusni. Akken tanekra ad tili mgal widen iɣeṭlen tafat deg wallen. Mi d- yenna wawal, awezɣi ikkenu zdat lebɣi, tettuɣal tira n twenza d tin yura ufus n ugdud yeccehwan tafat. Ass-nni ad tebreq tlelli n tmenna akken d lmuḥal ad ttwaɣen yiwecriḍen yellan d ifeṭṭiwjen n tlelli.
Ait Slimane Hamid