Yenna-yas ucennay (F.Ferragi) deg tezlit-is : « D acu ara d-yini wul, i iqeblen yeffeγ-it rruḥ, d acu ara d-yini laεqel, ur t-sεiγ iγab iruḥ ! », yeččur wul, yeqber yebγa ad yeṭṭerḍeq, allaγ yesbek, ur yezmir ad imeyyez, iles yeggugem, yeεgez i lmenṭeq, tasdawit i yellan d annar n tmusni, n yidles akk d tussna, d annar i d-yessufuγen imusnawen – irgazen d tlawin – iγef beddent tmura, imusnawen i isefḍen tirtaw n tizzelgi deg wallen n yimdanen, tasdawit i yeslemden acḥal d tasuta, tenğer isafen n tmusni, i yessefsan acḥal d iger, acḥal d taferka, … ass-a tasdawit tuγal d ayen-nniḍen, d annar, maca n … ur ẓriγ n wacu, xersum mačči n tmusni, acku tamusni deg-s tennejla, i tzelgi telli-yas tiwwura, teqqar-as ansuf yes-m !
Inelmaden, aḥlil, ur ẓriγ d acu ara d-iniγ fell-asen, acku ula d nek d yiwen deg-sen, maca tawaγit, d tallit ideg d-ggran, acku yeṭṭef-iten lḥal deg tesdawit n wass-a ! iqraben ččuren, izmamen ččuren, timsirin i d-ttaken yiselmaden, awi-d win ara yeγren, maca tigzi ulac, acku aselmed deg tesdawit n wass-a d win i yebnan γef uselmed quantitatif mačči γef uselmed qualitatif, yal aseggas s tnac n yilmuden naγ ugar, d acu ara teγreḍ, d acu ara teğğeḍ ? d taεkemt ẓẓayen γef unelmad meskin, iselmaden ur d-cligen ara ma zzant naγ rγant, abeḥri yettsuḍu deg wallaγen ilmawen, i teğğa tmusni d isukiyen.
Anelmad i yellan yesεa azal deg tmetti, d imwelleh, d amedya, d lemri uγur tettmuqul akk talsa, ass-a yeγli wazal-is, yettu tawuri-s, ur yeẓri d acu naγ iwacu i yeqqar, yeqqar kan, naγ yeqqar iwakken kan azekka ad t-id-isaḥ umahil am netta am widen akk i ixeddmen ama γran ama ur γrin, akka i ttxemmimen yinelmaden n wass-a, mačči d lebγi-nsen, maca d wa i d agemmuḍ n tesdawit n wass-a, tessufuγ-d ixeddamen, mačči d imusnawen, imi ass-a llaẓ yekkat kan s aεebbuḍ, ur yekkat ara s alla&gamma,; xas neffud tamusni, nelluẓ tussna, maca llaẓ-a yesganay kan, wanag ur ineqq ara, ihi imi llaẓ yekkat s aεebbuḍ, ečč ar terwuḍ, terreḍ taduli ad tegneḍ, yigwas ad d-takwiḍ, ass-n ad temmektiḍ, i texdem tesdawit n wass-a, akken i qqaren wat zik : « Tudert tedda d wass-a, tessaram azekka, xas tettγima d yiḍelli », ihi ar melmi ara tdum akka ? melmi ad d-yecreq yiṭṭij-nni ara icergen asigna n talast, i yesderγilen tamuγli, ass-n ad nessedrem tasdawit n wass-a, akken nebnu tasdawit n uzekka, tin ara irefden tamusni, idles d tussna i ittellin allen d wallaγen, tamusni i yettnamaren γef tumast d wansayen, tamusni i yebnan taγarma n yal agdud, n yal timetti, n yal tasuta yeffkan azal i tussna akk d tmusni.
Yaḥyun Lɛarbi