Imezdaɣ n uḥriq n 30 n yixxamen i d-yezgan gar uxxam n tqiwant n Lesnam d taddart Abbas Boudjenane begnen-d lɣiḍ nsen zdat maḥyaf i ttidiren taggara-agi, imi imḍebren teɛna temsalt rran-ten d rrif, ur asen-ssawḍen ara lgaz n temdint.
Imezdaɣ-agi, nnan-d belli ixxamen yellan tama nsen sfaydan yakan s waya, ma d nuni mazal ssewɛaden s aṛeggem n srabes n Sonelgaz i asen-d-yeqqaren yal tikkelt belli “tellam di lbal nneɣ, yerna deg wussan i d-iteddun ad nebdu lecɣal dinna. ”
Yiwen seg yimezdaɣ-agi yenna-aɣ-d d akken deg wussan-a n usemmiḍ, tuget deg lǧiran-is rwan tamkelleft deg unadi n tqerɛet n lgaz, almi uɣalen kerrun tikeryas ɣer tɣiwanin nniḍen iwakken ad d-awin ayen ara sxedmen i lḥamu d usewwi.
Imi araǧu iḍul, beggsen yimdanen-agi iwakken ad ssiwḍen tiɣri nsen i umḍebber amezwaru n twilayt, ahat ad afen tamezzuɣt ara yeslen i yiɣeblan nsen.
Sylia. M
Djebahia
03 n lmegtin, 25 n yimejraḥ
Tasebḥit n wass n ssebt yezrin, uqbel ad tifrir tafat, teḍra-d yiwet n twaɣit deg ubrid ameqran Asammar- Amalu deg umkan iwumi qqaren Belleḥnec tama n Djebbaḥiai d-yeglan s lmut n 3 yimdanen d 25 n yimejraḥ.
Ɣef leḥsab n ysallen i aɣ-d-yewwḍen, abaxix-agi yeḍra-d m akken uccagen sin n yikamyunen imeqranen, myewwaten gar-asen. Ssakin, s kra n wid i d-yeddan deffir-nsen kecmen wa yekkat wa. Ad naf 3 n yikamyunen nniḍen akked 16 n tkeryas.
Iɣallen n usellek i yewwḍen s amkan ssawḍen imejraḥ ɣer sbiṭer n Lakhdaria anda skelfen yis-sen imejjayen. Maca, ar tura, ur d-tban ara s wudem aḥeqqani ssebba n twaɣit-a. Ɣef leḥsab n widen yesnen amḍiq-agi, d agris ara yilin d ssebba tamezwarut n twaɣit-a. Daɣ, ula d inehharen ɣur-sen aḥric deg wayen yeḍran, imi tuget deg-sen ula ttqadaren ara isuḍaf n ubrid. Ɣas akken takessart yellan din tewɛer mačči d kra, tessutur leḥder ameqran, inehharen, labeɛda n yikamyunen, ttɛeddin s leɣseb, ur ttxemmimen ara ɣef tudert nsen, d tid n yimdanen nniḍen.
Sylia. M