« Amulli Ameggaz » d isem n yiwen seg yisefra i d-yeddan deg wamud, i yebγa umyaru ad yili d azwel n udlis-is aneggaru i d-yeffγen γer teẓrigin Tira. Am akken i nuγ tanumi yid-s, mass Brahim Tazaγart yezga yettawi-yaγ-d di tirawin-is γef yisental n tudert tatrart ideg nella ; tikelt-a yessfel-aγ i tizi n Akkin i Tira γer Tgelda n Tayri anda ttidiren Salas d Nuja. Yuγ lḥal kra kan n wussan i γ-iferrqen γef lεid n tayri neγ Saint Valentin, ass ideg ttafen tagnit wid yemyeḥmalen akken ad mbadalen lehdiyyat, neγ ad myehdun awalen ḥninen ladγa tamedyazt ifazen am yisefra n Brahim Tazaγart imi ddan akked lweqt d tatrara. Isefra yellan deg wamud « Amulli Ameggaz » d tamedyazt tilellit i yerẓan leqyud i icekklen ulawen i yebγan ad ssenfalin γef wussan izegzawen i yesεedda (neγ i yettmenni ad yesεeddi) yal amdan ; yenna deg usefru « Skaddbeγ » :
Tecfiḍ !
Ulac tiγmert i neğğa,
Ncula di yal tama ;
Nγemmes deg waman n yilel,
Neglalez deg yal lεedra,
Nuzzel γef yijdi yerγan,
Nessumet iẓra di teẓgi ;
Nnig-neγ llan yibkan,
Wehmen mi nerfed tiγri.
Amedyaz Brahim Tazaγart, ur yeqqim ara kan deg uwessef n cbaḥa n tmeṭṭut d usenfali γef tayri s ucucref neγ sufella kan, netta yetεemmeq deg unadi γef yizumal d tewlafin, yessetεan s tneqqist akken ad ibeyyen yes-s tidet n tayri-s d telqay-ines, yenna deg usefru « Ad am-d-awiγ » :
Ad am-d-awiγ ayefki n tsedda
Deg teglimt n mmi-s.
Ad am-d-ččareγ uraw
D aman iγef mcenqaren yidurar
Ad am-t-in-ssendiγ s imi.
Ad n-rzuγ fell-am
Gar yifassen-iw tteffaḥ ninuḥ
Yerran amγar d amecṭuḥ.
« Nnul n wallen-im », « Rriḥa n temẓi », « Tameṭṭut n tiselbi » d yisefra-nniḍen i d-yeddan deg wamud, yal yiwen seg-sen d tafelwit i d-yettalsen tamacahut n tayri i yedder neγ i yezmer ad yidir yal yiwen ; acu kan amedyaz yura-tt s yisekkilen n wureγ yeččuren d lemεani. Akka i d amedyaz, netta yezga yettḥussu s kra yellan, ula s wayen iγef rran tadimt yimdanen, timsal umi d-tezzi s weεrur tmetti-nneγ armi i uγalent d iṭabuten. Mass Brahim Tazaγart, yerẓa yiwen s yiṭabuten-a s usefru i d-yewwi γef lmeḥna n tmattakin ; tilawin-a i ixellsen di tugti-nsent, azal n lqanun n twacult i yessulin deg uzref n urgaz γef tmeṭṭut, i taswiεin yetεedday fell-as armi i tuγal d sselεa iγef ttemqacaren wid yettnadin γef lbenna n tuzzuft. S umata, amyaru Brahim Tazaγart, yenna-d s tmedyazt ayen akk i yezmer ad yini yal yiwen seg-neγ γef usentel n tayri d yisental-nniḍen n tudert tatrart, acu kan netta yenna-t-id s tmeslayt icebḥen yeččuren d lemεani ; ta d lbaḍna-s, ala netta i tt-yessnen.
Mokrane Chikhi