Σlaḥsab n yisallen i aγ-d-yewwḍen, tessufeγ-d tedbelt n lwilaya n Bgayet lameṛ n uγlaq n waṭas n yikabaṛiyen d les discothèques ladγa wid i d-yezgan di temnaḍt n ssaḥel, s sseba n war aqader n yimawlan n yixxamen-a imeqranen i leqwanen i ten-yesselḥayen. Rray-a i teddem tedbelt, yessaged aṭas n yixeddamen ladγa tilawin n zhu i umi ara taεer tudert mebla ccek mi ara ad d-afent iman-nsent deg uzniq.
Aṭas daγen i iwehmen di lameṛ-a, imi aya yezmer ad d-yawi lexsara i uḥric n tmerrit deg lwilaya, ayen daγen ara yesnernin deg umḍan n wid ur nxeddem ara. Akka tura llan azal n 1000 n yixeddamen imezgiyen deg yixammen n zhu γef uswir n lwilaya, mebγir wid i ixeddmen deg-sen di tsemhut n unebdu, tasemhut ideg d-ttasen d luluf n yiḥewwasen. Γef akken i d-yura uγmis n L’Expression, n wass n lexmis iεeddan : « Aṭas seg wid ixeddmen deg yixxamen-a imeqranen yellan di Bgayet, gar-asen icennayen ttmennin ad ffγen γer ubrid akken ad sutren ula d nutni azref-nsen, imi ur ẓrin ara amek ara yili uzekka-nsen ma ḥebsen-ten-id seg yixeddim ». Aya yella, meεna aṭas i yesneqden ddula i yesεan sin n yinawen ur nemεaba ara akked lwaqeε ; seg yiwet n tama bγan ad snernin aḥric n tmerrit, seg tama-nniḍen sersen γef uqerru-s aneγlaf seg ukabar n at Icumar !
Mokrane Chikhi