Ma tecfiḍ ay amdakel ɣef yiḍ-nni amezwaru, ɣef tmuɣli tamezwarut, yuder ccfaṛ yuli, temmermeɣ d imeṭṭawen, uzzlen am waman, aman n igenni, aman n lebḥer, aman n ṣṣura … ad tuɣal ad d-teswawi lehwa taneggarut . Iḍ-agi ɣezzif fell-I, ad faṛsaɣ leḥbab n wul: lḥal iṛuḥ am acemma, d lewhi n leḥdac n yiḍ, qrib ad yemmlal wass d yiḍ am akka I d-nemlal. Nemlal-d s wallen, s tikti, s tira, s ṣṣut, s nnhati, s ssuṛa, s ubeḥri. Nessuk-d tamuɣli ɣef taddart bnan at Ṛebbi ɣef waman. Ixxamen tḥenncen, wa s idis n wa, xas ferqen-ten waman, ijemɛi-ten ṣṣut ubeḥri n lyali am wakken d asčenčen n tzebgatin n yelli Ɣriba. Tasusmi n yiḍ tecbeḥ s teftilin , s rriḥa n lehna, s rriḥa n liser. Imi ara sen-tesselfeḍ s tmuɣli am zun tebriḍ I yman-ik ɣef waman, ad tiliḍ akken kan telliḍ, am uqeclaw, fessus, akken i s-yehwa ad yurar d waman, rsen neɣ rwin kif kif. Iḍ-agi ɣezzif fell-I ad faṛsaɣ leḥbab d tirni: d asuden n yiwen yiḍ, d tamuɣli n yiwen yiḍ, d iḍes n yiwen yiḍ, d lemḥibba n yiwen yiḍ, d afares n lehna n yiwen yiḍ, d ccnawi n yiwen yiḍ, d azuzen n yiwen yiḍ, d ul n yiwen yiḍ.Ɣer-I d asayes, ɣer-s d afaṛes. D iḍ aneggaru, iḍ n lebɣi, iḍ n lembat, iḍ n uraju n win tuyes. Qim-d yid-I si leɛḍil, ad tɛeddi zzedwa n uḥemmel, zzedwa n targit, zzedwa n lemni.. iḍa-agi ɣezzif fell-I, ad cnuɣ taɣect n waman, ad iliɣ am waman, ad lḥuɣ tikli n waman yettecruruden am wecrred ufus-is ɣef leḥrir, ad iɛzizeɣ I tmuɣli, “ad rwunt tarda wallen-ik, a winna ḥemmlaɣ”.
Zira