Deg wussan-a yezrin, kra n yimezdaɣ n M’chedallah akked wid n Aḥnif beggnen-d lɣiḍ nsen zdat n tsusmi n yimḍebbren ɣef temsalt n tririt n lemkaḥel n yimdanen-a deg tallit-nni i yebda rrebrab. Mačči d tikkelt tamenzut segmi akka i d-yella wawal ɣef usuter-a, maca acḥal d aseggas aya segmi i bdan wid terza taluft ssawalen ɣer tririt n yimrigen nsen. Ad d-nesmekti d akken ssawḍen almi xedmen aṭas n yinejmuɛen zdat uxxam n twilayt, sbedden yiwet n tseqqamut ara yettmeslayen ɣef yismawen nsen imerra. Maca, yal tikkelt ideg ara d-kkren, ttmagaren-ten-id yimḍebbren s uṛeggem. Tikkelt-a, ruḥen rran ẓẓerb i ubrid aɣelnaw wis-5, ahat ad yaweḍ ṣṣut nsen ɣer wid ara tt-igezmen di ṛṛay.
Sylia. M
Tikjda
45 n wussan n uneḥbus ɣef
lxedma u mazal !
Taluft yettidir usensu n Tikjda yegguma ad d-yeḍher yixf-is. Amek ihi, zrin 45 n wussan segmi i as-tuɣal tebburt, ulac win i ɣeẓẓan wanzaren-is, ad yekker ad tt-yegzem di ṛṛay, ad yefru tamsalt. Amek ihi, ixeddamen i yegguman ad uɣalen s imukan nsen alamma ssawḍen ɣer lebɣi nsen ur ufin ara tamezzuɣt i usuter nsen. Ɣas akken ixeddamen-a ḍeffren akk iberdan n ṣṣwab uqbel ad awḍen ɣer ṛṛay n uḥbas n lxedma, maca ar ass-a ur d-iban kra ɣef taluft-a, nutni qqimen, imḍebbren ssusmen. D acu kan, aneḥbus ɣef lxedma yegla-d s uḥbas n tjernanin, ayen yerran ixeddamen-a deg yir liḥala.
S. M