Axxam n yemγaren d yimeεdar n Buxalfa n temnaḍt n Tizi-Wezzu s lemεawna n tmehla n yiweszla Ametti (DAS) sudsen-d yiwen n wass n unferray (journée de sensibilisation), ddurt-agi yezrin ass n 15 yunyu deg wexxam yedles n Lmulud At Mεemmar n temdint n Tizi-Wezzu ilmend n wass agreγlan n umennuγ mgal yir Sniret n yemγaren. Iswi n tmesbanit-agi, bγan a d-gren tamawt i yemdanen γef uḥareb d leqder d tayri n yemγaren. imesbaniyen bγan a d-ẓẓun tayri d leḥnana deg wulawen n yemdanen, bγan akken imdanen merra a d-fahmen imγaren, a d-qqeblen a d-llin akken bγan acku amγar melmi meqqar laεqel-is yettuγal am wegrud.
Ihi asarag i d-yellan di tzeqqa tameẓyant n wexxam n yedles n Lmulud At Mεemmar s wazal-is, acku deqs n yimsaragen meqqren i d-yemeslayen γef demma n waya. Amekfadu n usarag agi d mass Oueld-Chikh, yiwen uεeggal n tmehla n yiweszla Ametti.
Tamsiwt Fazia Aziz, tanemhalt n wexxam n yemγaren d yimeεdar n Buxalfa n temnaḍt n Tizi-Wezzu tewwi-d awal γef tudert n yemγaren d wuguren-nsen n yal ass deg wexxam-agi n yemγaren n Buxalfa, syen temesla-y-d γef tallelt i sen-tefka swayes qublen uguren-agi. Si tama niḍen mass Tiγa anemhal n tmehla n yiweszla Ametti (DAS) n Tizi-Wezzu, yewwi-d awal s tewzel γef usentel-agi. Γer-s akkin, Ccix Si Lḥağ Moḥand tiyeb, aεeggal n tmehla n lḥubus yewwi-d awal γef yemγaren d metti di ddin. syen akkin tamsiwt Xelfan (psychologue), mas Madiou amejjay di (CHU) n Tizi-Wezzu, mass adane hamid amejjay n wallaγ deg sbiṭar n Fernane Hanafi di Wed Σisi, meslayen-d merra γef Tumant-agi. Ma yella d mass Said Bouazri yewwi-d ameslay γef wemγar di tjadit, yewwi-d awal γef wemḍiq yesεa wemγar di tmetti d ttwacul.
syen akkin tella-d tmeγra meqqren aṭas deg wexxan n yemγaren n Buxalfa (iḍebbalen, dkker, cna, tacquft n umezgun..atg). Γer tagara fkkan arazen i yemγaren d yimeεdar i yellan din. tajmilt tuγal-asen akken iwata, maca nessaram yal ass asen-t-tuγal tejmilt-agi.
Islam Bessaci