Axxam n tmerrit d waddal n Tikjda yelli tiwwura-s ass n ssebt iɛeddan i tfaska tis-snat n ccna. Tameɣra-agi i d- yellan ɣef teɣzi n sin n wussan tendeh tameddit n wass s lmendad n yimḍebbren n twilayt gar-asen amaray amatu, anemhal n yidles d kra n wudmawen n yiɣallen n laman.
D inaẓuren n temnaḍt n Tubiret gar-asen Oujrih, Atoui d wiyaḍ i yeldin rreḥba, am wakken i yetturaju daɣ ad d-awḍen icennayen nniḍen. D acu kan, tafaska n tikkelt-a txulef s waṭas tid iɛeddan. Aya, iban-d s lixsas meqren n yimdanen ur d-nusi ara ɣer Tikjda. S kra n wid akk i nesteqsa nnan-d d akken ur slin ara s tmeɣra-agi, ayen i d-ibeggnen lixṣas deg uhric n taywalt. Ssebba nniḍen, ma nuɣal ɣer temlilit n useggas yezrin, ad naf belli asnubget n Lounis Ait Menguellet, Abranis d kra n wudmawen n tẓuri yerna di ccan n tfaska, almi ur yessaweḍ ara usensu n Tikjda ad yawi akk ayen i d-yusan n yimdanen. Ɣas tiwaculin ggtent, imi d tagnit i waṭas deg-sent ad walint srid Amedyaz. Ur yelli d asenqes deg ccan n yinaẓuren nneɣ yellan deg tmeɣra-agi, maca amkan n Lounis d Abranis s wazal-is.
Tamentilt nniḍen i yeǧǧan tafaska-agi ur yeffiɣ ara fell-as wawal mebla ccekk d taluft yedder usensu n Tikjda ɣef teɣzi n tlata n wagguren n uḥbas ɣef lxedma. Aya, yeǧǧa-d ccama ur nettwakkas ara s shala, imi amkan yecban wa tettwaqqen fell-as tiṭ tlata n wagguren, ixeddamen-is msakit ulac tawwurt ideg ur wwiten ara. D ayen i yessawḍen imdanen qrib ad ttun yella usensu deg tɣaltin n Ǧerǧer.
Akken yebɣu yili lḥal, tuɣalin ɣer leɛwayed n uxxam-agi n tmerrit d waddal n Tikjda tella-d ɣas ulamma s wudem d asemmaḍ, maca ahat ad yili d tasarut i waṭas n tfaskiwin nniḍen
Sylia. M