10 n yiseggasen i iεeddan γef wasmi i tewwet Lqaεida s tmesrifgin alamas n tenzut n tmurt n Marikan, World Trade Center i d-yezgan di temdint n New York. Ass-n, 11 cutember 2001 yexleε akk umaḍal, aṭas i yenwan d nnger n ddunit i d-yewḍen, imi tamurt akk yeqwan deg umaḍal ur tt-mniεen la lεeskeṛ-is la iγallen-is uffiren(CIA), ula d yiwen seg-sen ma yessaweḍ ad yeḥbes tiyita iḥuzan World Trade Center, d netta akk i d lbenyan εlayen di ddunit, d azamul n utqeddem d temγer n tmurt n Marikan. Tawaγit-a txellef-d deffir-s azal n 3000 n lmeytin d luluf n yimejraḥ seg yimdanen menwala, i yexḍan i ṭṛad adyuluji yekkren ger umdakel aqdim n Marikan Oussama Ben Laden d uselway George Walker Bush. Segmi i yeḥbes Ben Laden amenγi mgal iṣubyatiyen di tmurt n Afghanistan deg useggas n 1989, yeldi tirni tamaynut mgal Marikan, i yettwali d taεdawt n yimselmen, γas ma tamurt-a tesεa assaγen gerrzen akked tmurt-is Suεudiya d twacult-is i yesseftin idrimen imeqṛanen deg waṭas n tkebbaniyin timarikaniyin. Tasiγt tamenγimant (attentat suicide) i xedmen yirebraben n Lqaεida, amussu n Ben Laden deg ass n 11 cutember 2001, tusa-d d tagnit akken aselway George Bush ameẓyan ad iger tamurt-is di ṭṛad ur nesεi taggara, tuγal Lqaεida d aεdaw amezwaru n Marikan. S wakka ẓedmen lεeskeṛ-is s ddaw tecḍat n tdukli n NATO γef tmurt n Afghanistan, tamurt ideg yeḥkem umussu n Ṭaliban, amussu yesεan assaγen igerrzen akked Ben Laden. Deg useggas n 2003, George Walker Bush yesεedda ṛṛay-is , iqenneε at ṛṛay di Marikan akken ad ẓedmen γef Lεiraq, tamurt yakan i yewwet baba-s asmi yella d aselway deg useggas n 1990. Marikan mbeεd tiyita i as-tefka Lqaεida, tuγal tenhewwal armi i teḍṛa yid-s « am win yettnaγen d lexyal », s kra n win i t-wala d aεdaw-is tegr-it-id di nnican.
Uqbel tawaγit n 11 cutember, tella tmurt n Lezzayer tezzi fell-as tegnit n ddiq, rrebrab aslamawi yexdem axeṣṣaṛ deg teṛwiḥin n yimdanen ur nuklal, tawaγit i tt-iqublen d lεeskeṛ n tmurt d yiγallen n laman-nniḍen mebla ma ḥussen leǧnas i wayen iṣaṛen akked yizzayriyen i yettmettaten s tsusmi . Di tallit-nni daγen, qwan leckuk γef anta tama i ineqqen, imiren i isaγ usteqsi-nni : « Anwa i ineqqen anwa ? ». Meεna, segmi i teldi Marikan tawwurt n ṭṛad mgal Lqaεida, tekcem Lezzayer γer ṣṣef n tmura yettnaγen mgal rrebrab, ula d irebraben izzayriyen uγalen sfeṛzen-d tamsalt akken ilaq mi gren iman-nsen deg umussu n Lqaεida n Lmeγṛeb Imeslem (AQMI), s wakka iban-d uxṣim amezwaru n tegduda, tekkes γef lḥukkam n tmurt tegnit-nni n ccek i ten-id-yessenṭafen yal tikelt mi ara d-yili wawal γef temsalt n tmenγa di Lezzayer.
Tamettant n Ben Laden deg unebdu iεeddan, ur texdim ara taggara i Lqaεida, seg yimiren γer da, aṭas n tsiγin timenγimanin i d-yeḍṛan ama di Afghanistan neγ di Pakistan, neγ di Lεiṛaq, taneggarut texdem-itt l’ AQMI di Lezzayer, mmuten deg-s 16 n yinelmaden ifesyanen n tkadimit taserdast n Cherchell. Segmi yemmut Ben Laden, iban-d daγen belli rrebrab ur yelli ara kan d amussu n yimṭuṛfa imselmen, tawaγit yeḍṛan di tmurt n Norvège anda yesṭeṛḍeq iman-is yiwen n yilemẓi zdat n lemqeṛ n udabu n tmurt-a i yeglan s waṭa seg leṛwaḥ, tessebgen-d belli akk imussuten imṭuṛfa yettek-d seg-sen rrebrab mačči kan γer yimselmen i yella, ilemẓi-ya d amedya imi netta d aεeggal deg umussu amasiḥi amṭaṛfu n tmurt n Norvège.
S wakka iban-d am lemri dakken ma bγant s tidet tmura n umaḍal ad ḥebsent rrebrab, ilaq ad nnaγent mgal wid izerrεen tiktiwin n cceṛ i yettarran amdan d lweḥc. D tamsirt daγen i Lezzayer, γas aḥezzem n yiγallen n laman d lemṣalḥa taγelnawt n uselway Butefliqa, akken ad tfak cceda, ilaq ad wten azrem s aqeṛṛu, ilaq ad sen-gedlen abrid i wid i izerrεen tiktiwin timṭuṛfa ama deg yiγeṛbazen neγ deg leǧwameε neγ deg walγagduden, wa d amennuγ n talwit γas yebεed ubrid-is, maca yessufuγ γer yiswi.
Mokrane Chikhi