«Limer ad i yi-ssextiren gar Lezzayer d tugdut, ad xtireɣ Lezzayer ». Wigi d imeslayen n Sliman Ɛmiran i yeqqimen deg wallaɣ n watas n tsutwin. Ilul Sliman Ɛmirat ass n, 24 yulyu 1929, deg taddart n Tqerbust asamar n Tubiret.
Ɣef 26 n yiseggasen deg leɛmer-is, yekcem ɣer ALN deg-i d-yufrar sdat wallen n Abderaḥman Mira i as-yessutren ad yinig ɣer Fransa akken ad yenhu Izzayriyen yellan dinna ɣef temsalt n tegrawla Tazzayrit. Syin, yuɣal d imḍebber n Le groupe de choc yetabaɛen FLN n temnaḍt n Pari mgal imsaliyen n Umussu aɣelnaw azzayri MNA.Yettwaṭṭef ɣer lḥebs deg useggas n 1958 di Qsentina akked lǧurf di temnaḍt n Msila. Acu kan, urǧin yerẓa lḥebs ifadden-is imi deg yir tignatin-nni ikemmel amennuɣ-is.
Mi d-yeffeɣ si lḥebs, yuɣal ɣer Fransa s lekwaɣed ur nseḥḥi ara. Ikemmel deg ubrid Le groupe de choc n Pari, maca yettwasenz-d deg useggas n 1961. Yettwaṭṭef ɣer lḥebs tikkelt-nniden anda i yesεedda lbaṭel deg Saint Maurice L’ardoise akked Larzac armi d 19 meɣres 1962, yeffeɣ-d s ddaw leḥris n tmesbanit i heggan yisdawanen izzayriyen d irumyen di Pari.
Yuɣal-d ɣer Lezzayer anda ikemmel amennuɣ mgal L’OAS . Yeslal-d ass n, 18 tuber 1967, ɣer tama n yimeɣnasen iɣelnawen-nniden Amussu amagday i usnulfu Azzayri (MDRA) i iqubel udabu s tuṭṭfa n Sliman Ɛmirat ɣer lḥebs ass n, 7 yulyu 1968, s tuffra azal n 9 wagguren almi teḥkem fell-as tsenbert tagrawliwt n Wehran s lmut. Yesɛedda-d 4 n yiseggasen d uzgen di lḥebs n Wehran iwumu qqaren Santa Cruz.
Seg Wahren ɣer lḥebs n Berwagiya anda ara yernu εamayen, syin ɣer lḥebs Lḥarrac. Yerna 6 n wagguren din, syin yeffeɣ-d ass n, 23 yunyu 1975 smana seld lmut n baba-s. Ikemmel amennuɣ armi d aseggas n 1989 anda yuɣal (MDRA) iteddu s wudem unṣib ass n, 19 yennayer 1990.D ameɣnas ,d ameɣras, yessarmen Lezzayer tamagdayt, tin ara yeddun ɣer sdat s umgarad-is utlayan adelsan neɣ asnaktan s udiwenni d usqerdec n temsal.
Mi iruḥ Sliman Ɛmirat, deg umenzu n yulyu 1992, ad iwali i tikkelt taneggarut tafekka n umeddakkel-is n umennuɣ Muḥemmed Budyaf i yettwanɣan 3 wussan kan uqbel, yeḥbes wul-is mi i t-iwala.
Nisma Tigrine